2019-yil 19-mart kuni soat 17:00 larda Kattaqo‘rg‘on tumani, “Nomozpolvon” mahallasida yashovchi Ixtiyor Irgashev Toshkentda bo‘lgan vaqtida turmush o‘rtog‘i L.N. qarindoshining uyiga ruxsatisiz borganligini vaj qilib, uni telefon orqali haqoratlagan. Toshkentdan kelguniga qadar farzandlarini qoldirib, o‘zi uydan chiqib ketishini talab qilgan.
20-mart kuni soat 04:00 atrofida Toshkentdan uyiga qaytgan Ixtiyor turmush o‘rtog‘iga beshafqat muomala qilgan. Sha’ni va qadr-qimmatini kamsitib, ikki nafar voyaga yetmagan farzandini qoldirib, uyidan chiqib ketishini talab qilgan, urib, tan jarohati yetkazgan.
Bu tayziqlar oqibatida L.N. o‘sha kuni soat 05:30 atrofida uyidagi og‘ilxonaga o‘zini osib, joniga suiqasd qilgan. Turmush o‘rtog‘ini osilgan holda ko‘rgan I.Irgashev va uning onasi uni qutqarib, Kattaqo‘rg‘on shahar tibbiyot birlashmasi jonlantirish bo‘limiga olib borgan. Biroq shifoxonada ko‘rsatilgan tibbiy muolajalarga qaramasdan L.N. 2019-yilning 26-mart kuni vafot etgan.
Jinoyat ishlari bo‘yicha Kattaqo‘rg‘on tuman sudining ochiq sud majlisida sudlanuvchi I.Irgashev o‘z aybiga qisman iqrorlik bildirdi.
Sud majlisida dastlabki tergov organi tomonidan sudlanuvchi I.Irgashevning moddiy tomondan aybdorga qaram bo‘lgan shaxsga nisbatan rahmsiz muomala qilish, uning sha’ni va qadr-qimmatini muttasil ravishda kamsitish natijasida uni o‘zini o‘zi o‘ldirish darajasiga yetkazishda ifodalangan jinoiy harakati to‘g‘ri kvalifikatsiya qilingan deb hisoblandi.
Jinoyat ishlari bo‘yicha Kattaqo‘rg‘on tuman sudi raisi Temur Almamatovning “Daryo”ga ma’lum qilishicha, sudlanuvchi Ixtiyor Irgashev Jinoyat Kodeksining 103-moddasi 2-qismi “a” bandida nazarda tutilgan jinoyatni sodir etganlikda aybli deb topilib, 7 yil va 6 oy muddatga ozodlikdan mahrum qilish jazosi tayinlandi.
Izoh (0)