Norvegiyadagi talaba Amaliya Markota Andersen “Darius” laqabli kalamushni boqardi. Andersen animatsiya va raqamli san’atlarni o‘rganayotgani tufayli o‘z uy hayvonida ham san’atga muhabbat uyg‘otishga qaror qildi. U Dariusga akvarelda rasm chizishni o‘rgatdi, deya yozadi Meduza.

Foto: Reddit

“Men xavfsiz akvarel to‘plamini oldim, u yerga kalamushning kichik panjalarini botirib, uni oq qog‘ozga qo‘yib yubordim. Bu jarayon qandaydir tasvir vujudga kelmagunicha davom etardi”, — deb hikoya qiladi Amaliya Anderson.

Darius qoyilmaqom abstrakt asarlar yaratdi. Har bir kartinaning chizilishiga taxminan 10 daqiqa vaqt sarflanardi. Amaliya Darius chizgan uch yoki to‘rtta akvarel asarni sotishga ham ulgurgan. Sotuvdan tushgan pullar evaziga kalamushni ko‘chada sayr qildirish uchun tasma sotib olgan.

Foto: Meduza

Ammo Dariusga ham boshqa rassomlar kabi o‘lganidan keyingina mashhurlik nasib etdi. Kalamush rassom 2019-yil boshida o‘lgan bo‘lsa, u chizgan suratlar Twitter’da postlar qo‘yila boshlanganidan keyin sentabr oyida tanila boshladi. Dariusga qiziqish ortgach, odamlar yodiga uning egasi Andersen Tumblr’da akkaunt ochgani va kalamushi haqida yozganlari tushib qoldi.

“U hayotimda og‘ir damlar kuzatilayotgan bir davrda kirib keldi, o‘sha vaqtda yashashdan maqsadim nimaligi va o‘zligimni izlayotgandim. U zulmat olamimdagi yorqin nur edi. <…> Men shu kichik mavjudot hayotimga kiritgan o‘zgarishlar uchun undan minnatdorman. U kichik suratlari bilan nafaqat mening, balki uni yaxshi ko‘rib qolgan minglab muxlislarining hayotiga quvonch ulashdi” — deya kichik do‘stini xotirlagan Anderson.

Foto: Meduza

Andersen uyida yana ikkita kalamush boqadi, lekin ular akvarelda rasmlar chizmaydi.