Toshkent viloyatida 23-sentabr kuni soat 09:00 atrofida Bo‘ka tumani Istiqlol ko‘chasidagi uylarning birida molxona yonib ketgan, deya xabar bermoqda Davlat yong‘in xavfsizligi xizmati.
Yong‘in haqidagi xabar o‘t o‘chiruvchilarga 09:08 da kelib tushgan, 09:16 da esa voqea joyiga ikkita o‘t o‘chirish bo‘linmasi yetib borgan. Olov 09:35 da qurshab olinib, 11:05 da to‘liq o‘chirilgan.
“Yong‘in oqibatida molxonaning 90 kvadrat metr maydonda tomi va u yerda saqlangan somon presslari yongan. Tan jarohati olgan va halok bo‘lgan fuqarolar yo‘q”, — deyiladi rasmiy axborotda.
Yong‘indan molxonaning 80 kvadrat metr maydoni saqlab qolingan va alanganing yashash uyiga o‘tib ketishi oldi olingan. Qo‘shimcha qilishlaricha, hozirda yong‘in sababi va moddiy zarar miqdori aniqlanmoqda.
Izoh (0)