Xitoyda jurnalistlar mamlakat rahbari Si Szinpinning ta’limotini bilishiga doir imtihondan o‘tkaziladi

Xitoyda jurnalistlar uchun mamlakat rahbari Si Szinpinning mafkuraviy va g‘oyaviy ijodini bilishlariga doir ommaviy imtihon o‘tkaziladi. Ularning professional attestatsiyasi imtihon natijalariga bog‘liq bo‘ladi. Bu haqda South China Morning Post nashri ma’lum qildi.

Pekinda ayrim davlat yangilik agentliklariga bu haqda tegishli xabarnoma yetkazilgan. Ularga imtihon shu yil oldinroq ishga tushirilgan maxsus dastur orqali o‘tkazilishi ma’lum qilingan. Jurnalistlar bu dasturda ro‘yxatdan o‘tishi kerak bo‘ladi.

Imtihonda mamlakat bo‘ylab minglab reportyorlar va muharrirlar ishtirok etadi. Dastlab Pekindagi o‘nlab rasmiy nashrlar xodimlari sinovdan o‘tadi.

Imtihon bir necha qismdan iborat bo‘ladi. Jurnalistlar, jumladan, Si Szinpinning sotsializm rivojiga bag‘ishlangan ta’limoti va targ‘ibot haqidagi fikrlariga oid savollarga javob berishi kerak bo‘ladi.

Ushbu sinovdan o‘tish jurnalistlik guvohnomasini tasdiqlash uchun talab etiladi. Testdan o‘tolmaganlar uni qayta topshirishi mumkin bo‘ladi.