Britaniyaning Thomas Cook turoperatori 178 yillik faoliyatidan so‘ng yopilishini e’lon qildi. Bundan 600 ming sayyoh jabr ko‘rdi

Britaniyaning Thomas Cook turistik kompaniyasi bugun, 23-sentabr kuni majburiy ravishda tugatilganligini e’lon qildi. Bu haqda Meduza xabar berdi.

“Bugun millionlab sayyohlarning butun dunyo bo‘ylab kezishiga va maroqli hordiq chiqarishiga ulkan hissa qo‘shib kelgan kompaniyamiz uchun juda qayg‘uli kun”, — deydi Thomas Cook ijrochi direktori Piter Fankxauzer.

Kompaniyaning tugatilishi butun dunyoda 600 ming nafar turistning, jumladan 150 ming nafar Buyuk Britaniya fuqarolarining moddiy zarar ko‘rishiga olib keldi, deb yozadi Associated Press.

Thomas Cook’ning to‘rtta aviakompaniyasi parvozlarni to‘xtatgan, 16 mamlakatdagi 21 ming xodim ishdan bo‘shatilgan.

Buyuk Britaniya hukumati dam olish kunlari 23-sentabrdan 6-oktabrgacha bo‘lgan sayyohlar o‘z mamlakatiga qaytish xarajatlarini to‘lab beradi. Ular uchun o‘nlab charter reyslari buyurtma qilingan, birinchi bo‘sh samolyotlar Britaniya aeroportlaridan 22-sentabr oqshomida turli nuqtalarga uchib ketgan. CNN’ning yozishicha, bu tinchlik davrida Buyuk Britaniya tomonidan fuqarolarni mamlakatga qaytarish uchun qilinayotgan eng qimmat operatsiya. Uning qiymati 125 milliondan 750 million AQSh dollarigacha baholanmoqda.

Thomas Cook kompaniyasi moliyaviy ahvolining nochor holati haqida 20-sentabrda ogohlantirgan va inqirozdan chiqishi uchun 250 million AQSh dollari bera oladigan investor izlagandi.