Toshkent viloyati ma’muriy markazi — Nurafshon shahrida Prezident administratsiyasi rahbari Zaynilobiddin Nizomiddinov raisligida yig‘ilish bo‘lib o‘tdi. Toshkent viloyati hokimligi axborot xizmati xabariga ko‘ra, vazirlik, qo‘mita va idora rahbarlari, tadbirkorlar ishtirok etgan yig‘ilishda Prezidentning Toshkent viloyatiga tashrifi davomida berilgan topshiriqlar ijrosining borishi atroflicha, tanqidiy-tahliliy muhokama qilingan.
Shuningdek, yig‘ilishda viloyatda qo‘shimcha aniqlangan va kechiktirib bo‘lmaydigan muammoli masalalar va ularni hal etish, hududni ijtimoiy-iqtisodiy rivojlantirish bo‘yicha 2019-yil yakuniga qadar amalga oshiriladigan ishlar ko‘rib chiqilgan.
Zaynilobiddin Nizomiddinov faoliyatini amalga oshirishda muammoli holatga duch kelgan tadbirkorlar bilan muloqot qilgan. Ularni qiynayotgan masalalar tuman va shaharlardagi sektor rahbarlari, tegishli soha mutasaddilari ishtirokida atroflicha ko‘rib chiqilib, joyida ijobiy hal etilgan.
“Yig‘ilishda kun tartibidagi masalalar bo‘yicha mutasaddi rahbarlarning hisoboti eshitildi”, — deyiladi viloyat hokimligi axborot xizmati xabarida.
