Saudiya Arabistoni boshchiligidagi arab koalitsiyasi Yamanda harbiy operatsiyalarni boshladi. Koalitsiya ayrim harbiy obyektlarni yakson qilishni mo‘ljallagan. Taxminlarga ko‘ra, ushbu obyektlar terrorchilarga tegishli, biroq aynan qaysi guruhga ekanligiga oydinlik kiritilmadi, deb xabar beradi “Kommersant”.
Yamanning Al-Hudeyda shahrida operatsiya boshlangani haqida Turk al-Malik koalitsiyasi vakili ma’lum qildi. Masofadan turib boshqariluvchi va dengiz minalari o‘rnatilgan qayiqlar yig‘iladigan to‘rtta obyekt yo‘q qilingan. Ushbu obyektlardan Qizil dengiz va Adan qo‘ltig‘ini birlashtirib turuvchi Bob-ul-Mandab bo‘g‘ozidagi “yuk tashish va xalqaro savdoga tahdid soladigan jangovar harakatlar va terrorchilik operatsiyalari yo‘lida” foydalanilgan.
Ta’kidlanishicha, harbiy operatsiya xavfsizlikni ta’minlash maqsadida o‘tkazilgan. Harbiylar tinch aholidan ushbu obyektlarga yaqinlashmaslikni so‘ragan. Koalitsiyaning so‘zlariga ko‘ra, zarba oldidan barcha xavfsizlik choralari ko‘rilgan va ularning harakati “xalqaro gumanitar huquqlarga mos keladi”. Biroq xusiylar o‘z nazorati ostidagi “Al-Masira” telekanali orqali ma’lum qilishicha, koalitsiya avvalroq kelishilgan tinchlik bitimini buzgan holda zarba bergan.
14-sentabr kuni yamanlik isyonchilarning dronlari Saudiya neft obyektlariga so‘nggi 10 yildagi eng katta hujumni amalga oshirgan edi.
Izoh (0)