O‘zbekiston hukumati Toshkent yo‘lovchi transporti korxonalarini moliyaviy sog‘lomlashtirish haqida qaror qabul qildi. Bu haqda “Gazeta.uz” xabar bermoqda.
Hujjatda qayd etilishicha, o‘tgan yil to‘rtinchi choragi va joriy yil birinchi choragida “Toshshahartransxizmat” kompaniyasi tizimiga kiruvchi avtobus parklarida 38 milliard, Toshkent metropolitenida esa 2018-yil davomida va 2019-yil birinchi choragida 9 milliard so‘mdan oshiq qarzdorlik vujudga kelgan.
Qaror bilan Moliya vazirligi va poytaxt hokimligiga “Toshshahartransxizmat” avtoparklari zararini respublika va shahar budjetlarining qo‘shimcha manbalari, metropolitenga esa elektr energiyasidan qarzdorlik so‘ndirilishi bo‘yicha respublika budjeti prognozlari oshirib bajarilgani hisobidan qoplab berish topshirilgan.
Vazirlar Mahkamasi tegishli tashkilotlarga ikki oy muddatda “Toshshahartransxizmat” va poytaxt metrosini moliyaviy sog‘lomlashtirish, ko‘rilayotgan zarar miqdorini keskin kamaytirish yuzasidan takliflar kiritishni topshirgan.
Avvalroq, yakshanba kuni “Ko dnu” Telegram-kanali haddan tashqari ko‘p avtobuslar yo‘nalishlarga chiqmagani, kechga tomon yo‘nalishlarda avtobuslar deyarli qolmagani haqida xabar bergan edi. “Toshshahartransxizmat” kompaniyasi o‘sha oqshomning o‘zida shunday muammo bo‘lganini tan olgan edi.
Izoh (0)