O‘zbekistonning Birinchi Prezidenti Islom Karimovning kenja qizi Lola Karimova-Tillayeva Instagram’dagi sahifasida opasi — Gulnora Karimovaning taqdiriga oid savolga javob berdi.
“Xabardor.uz”ning xabar berishicha, Lola Karimovaning posti ostida qoldirilgan kommentlarning birida quyidagicha savol berilgan: “G‘alati savolim uchun kechirasiz. Opangizga achinmaysizmi?”.
So‘nggi vaqtlarda ijtimoiy tarmoqlarda sharhlarga javob qaytarishni odat qilgan Lola Karimova-Tillayeva opasining taqdiriga hamdard ekani haqida yozgan: “Men uning taqdiriga hamdardman. Uning ozod qilinishi masalasiga ijobiy ta’sir ko‘rsata olmayman. Shubhasiz, bu mening xohishimga emas, balki sud tizimiga bog‘liq... Men opam uchun faqat duo qila olaman”.
Eslatib o‘tamiz, 2019-yil avgustida Bosh prokuratura tomonidan Gulnora Karimovaga nisbatan yana uchta holat bo‘yicha — davlat mulkini talon-toroj qilish, O‘zbekiston manfaatlariga zid bitimlar tuzish hamda o‘zgalarning juda ko‘p miqdordagi mulkini tovlamachilik yo‘li bilan qo‘lga kiritish holatlari yuzasidan jinoyat ishlari qo‘zg‘atilgan edi.
Izoh (0)