Qarshi shahridagi 11-sonli umumiy o‘rta ta’lim maktabi hamda Qarshi tumanidagi 33-sonli maktab direktorlari joriy yil iyul-avgust oylarida ta’tildagi maktab o‘qituvchilarini majburiy mehnatga jalb qilgani bois jarimaga tortilgan. Bu haqda 18-sentabr, chorshanba kuni viloyat bandlik bosh boshqarmasining jurnalistlar bilan bo‘lgan muloqotida ma’lum qilindi, deb xabar beradi “Daryo” muxbiri.
Muloqot chog‘ida ochiqlanishicha, Qarshi shahridagi 11-sonli umumiy o‘rta ta’lim maktabi direktori Anvar G‘aniyev hamda Qarshi tumanidagi 33-sonli maktab direktori Feruza Ahmedova joriy yilning iyul-avgust oylarida ta’tilda bo‘lgan maktab o‘qituvchilarini majburiy mehnatga jalb qilgan va bu holat fosh etilgach, eng kam oylik ish haqining 3 baravari miqdoridagi jarimaga tortilgan.
Majburiy mehnatning har ikki holati ham jabrlanuvchilar bergan ma’lumotlar asosida aniqlangan. Bandlik bosh boshqarmasining ma’lumot berishicha, joriy yilning o‘tgan davri mobaynida viloyatda 12 marotaba majburiy mehnatga jalb qilish holati aniqlangan.
Tadbirda so‘z olgan viloyat Bandlik bosh boshqarmasi Davlat mehnat inspeksiyasi boshlig‘i Baxtiyor Fayziyevning aytishicha, “Mikrokreditbank”ning Kitob tumani filiali boshqaruvchisi 15 nafar xodimini majburiy mehnatga jalb qilgani sabab eng kam ish haqining 3 baravari miqdoridagi jarimaga tortilgan.
Shuningdek, G‘uzor tumanidagi 75-sonli maktab direktori Bahriddin Musulmonov ham mavqeidan foydalanib, maktab o‘quvchilarini ko‘cha tozalash ishlariga jalb qilgan. Qarshi tumanidagi 1-sonli maktab direktori o‘rinbosari Otabek Hamidov ham xuddi shu xatoni takrorlagan.
“Yuqorida tilga olinayotgan holatlarning barchasida aybdor deb topilgan mas’ullar o‘sha payt eng kam oylik ish haqining bir baravaridan 3 baravari miqdorida jarimaga tortilgan, endilikda jarimalar miqdori ko‘tarildi.
Ayni kunda shunday xatoga yo‘l qo‘ygan mutasaddilar eng kam oylik ish haqining 10 baravaridan 30 baravarigacha jarimaga tortilishi belgilab qo‘yildi. Voyaga yetmaganlarni majburiy mehnatga jalb qilish esa eng kam oylik ish haqining 30 baravaridan 50 baravarigacha bo‘lgan miqdordagi jarimaga asos bo‘lishi mumkin. Xato bir yil davomida takror sodir etilgan taqdirda mutasaddi eng kam oylik ish haqining 50 barobaridan 100 barobarigacha miqdordagi jarimaga tortiladi”, — deydi Baxtiyor Fayziyev.
Izoh (0)