“O‘zbekkino” Milliy agentligi rahbariyati Londonda BBC Broadcasting House kompaniyasi vakillari bilan uchrashdi. Bu haqda agentlik matbuot xizmati ma’lum qildi.
Uchrashuv doirasida so‘nggi 3 yil ichida Markaziy Osiyoda yuz bergan o‘zgarishlar, jumladan, O‘zbekiston va Afg‘oniston o‘rtasidagi munosabatlarning qayta tiklanishi va bu o‘zgarishlar oddiy odamlar, umuman, mintaqa hayotiga qanday ta’sir ko‘rsatayotgani haqida hikoya qiladigan bir qator hujjatli filmlarni suratga olish bo‘yicha kelishuvga erishildi.
Bundan tashqari, tarixiy va madaniy yo‘nalishda ham qator filmlar yaratishga kelishib olindi. Bu ro‘yxatda O‘rta Osiyoning birinchi fotosuratchisi va o‘zbek kinosining asoschisi Xudoybergan Devonov haqidagi film yetakchilik qiladi.
Kompaniyaning AQSh va Yevropa davlatlarida biznesni rivojlantirish bo‘yicha rahbari Frederik Durman uchrashuv chog‘ida BBC O‘zbekiston bilan jadal va samarali xalqaro hamkorlikni rivojlantirishdan mamnun ekanligini, yangi loyihalarning amalga oshirilishi nafaqat O‘zbekistonda, balki butun dunyoda BBC auditoriyasini kengaytirishini ta’kidladi.
“Katta Langar Qur’oni: Afsona va haqiqatlar” loyihasining muvaffaqiyatli amalga oshirilishi BBC va O‘zbekiston o‘rtasidagi hamkorlikning muvaffaqiyatli namunasi bo‘ldi. Ushbu film orqali biz jahon, ayniqsa Yaqin Sharq auditoriyasiga O‘zbekistonning boy madaniy merosi, shuningdek, ma’rifatparvar islom g‘oyalari haqida ma’lumot berishga harakat qildik”, — dedi Yaqin Sharq mintaqasi bo‘yicha jurnalistika bo‘limi boshlig‘i Salim Patka uchrashuv davomida.
O‘z navbatida, “O‘zbekkino” Milliy agentligi Bosh direktori Firdavs Abduholiqov hamkorlikda nafaqat hujjatli filmlar yaratish, balki O‘zbekistondagi yosh hujjatli kino ustalarining ijodiy saviyasini oshirishga qaratilgan o‘quv seminarlarini muntazam ravishda o‘tkazish muhimligini ta’kidladi.
Izoh (0)