Namangan shahridagi taniqli tadbirkorlardan biri o‘zi o‘qigan maktabga 25 ta zamonaviy televizor sovg‘a qildi. Bu haqda “Daryo” muxbiri Azizbek Abduvaliyev xabar berdi.
Viloyat xalq ta’limi boshqarmasi axborot xizmatining qayd etishicha, shaharning “Yuqori G‘irvon” mahallasida joylashgan 80-umumta’lim maktabidagi jami 24 sinf xonasi va ma’naviyat xonasi ushbu televizorlar bilan jihozlandi. Hozirda bu yerda 1100 nafardan ortiq o‘quvchi tahsil olib kelmoqda.
— Tadbirkorimizning o‘zi ham bundan 20 yil avval shu yerni tamomlagan. U yangi o‘quv yili boshlanishidan oldin ham maktabdagi eski yoritgichlarni yangilash uchun 10 million so‘m ajratgan edi, — deydi maktab direktori Oqiljon Hasanov.
Ta’kidlash joizki, hozirda Yaponiyada xizmat safarida bo‘lib turgan tadbirkor nomi oshkor etilishini istamadi.
Izoh (0)