16-sentabr, dushanba kuni Beshariq tumanida “Markaz—2019” xalqaro o‘quv-mashg‘ulotida qatnashish uchun O‘zbekisonga tashrif buyurgan tojikistonlik harbiylar kutib olindi. Bu haqda Mudofaa vazirligi Axborot va ommaviy kommunikatsiyalar departamenti xabar berdi.
Tantanali marosimdan so‘ng tojikistonlik harbiy xizmatchilar Namangan viloyatida joylashgan “G‘urumsaroy” dala-o‘quv maydoniga yetib keldi va mashg‘ulotlarga tayyorgarlikni boshlab yubordi.
Kunning ikkinchi yarmida o‘zbekistonlik va tojikistonlik harbiylar ishtirokida brifing tashkillashtirilib, Mudofaa vazirligi mas’ul ofitserlari “Markaz—2019” o‘quv-mashg‘ulotlarining tartibi hamda undan ko‘zlangan maqsadni mehmonlarga yetkazdi.
17-sentabr, seshanba kuni “G‘urumsaroy” dala-o‘quv maydonida O‘zbekiston va Tojikiston harbiylari ishtirokidagi strategik qo‘mondonlik shtab mashg‘ulotlari doirasidan o‘rin olgan “Markaz—2019” o‘quviga start berildi.
Ochilish marosimida so‘zga chiqqan O‘zbekiston mudofaa vazirining birinchi o‘rinbosari, Qurolli Kuchlar Bosh shtabi boshlig‘i general-mayor Pavel Ergashev ushbu o‘quv mashg‘ulotlari ikki davlat o‘rtasidagi harbiy munosabatlarning mustahkamlanishiga hamda jangavor tayyorgarlikni oshirishda muhim o‘rin tutishini ta’kidlab, o‘quv-mashg‘ulotlarida ishtirok etayotgan o‘zbek va tojik harbiylariga muvaffaqiyat tiladi.
Tojikiston Quruqlikdagi qo‘shinlar qo‘mondonining birinchi o‘rinbosari general-mayor Ixtiyor Oxunzoda Ne’matullo ham “G‘urumsaroy” poligonida tashkillashtirilayotgan “Markaz—2019” o‘quv-mashg‘ulotlarining O‘zbekiston va Tojikiston harbiylarining hamkorligida tashlangan navbatdagi qadam bo‘lishini aytib, tadbir tashkilotchilariga do‘stona kutib olish tadbirlari uchun o‘z minnatdorchiligini bildirdi.
Izoh (0)