Janubiy Koreya Milliy mudofaa universiteti delegatsiyasi O‘zbekiston Qurolli Kuchlari akademiyasiga tashrif buyurdi. Delegatsiyaga universitet dekani professor Kvon Te-Vuk boshchilik qildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Qurolli Kuchlar akademiyasi boshlig‘ining o‘rinbosari polkovnik Ruftullo Ne’matov uchrashuv davomida ikki mamlakatning uzoq vaqt davomida sinalgan strategik hamkor ekanligini ta’kidlab o‘tdi. Ikki mamlakat rahbarlarining yuqori darajadagi tizimli aloqalari O‘zbekiston — Koreya Respublikasi o‘rtasidagi harbiy munosabatlarni yangi darajaga olib chiqdi.
Mazkur yo‘nalishda Qurolli Kuchlar akademiyasi va Janubiy Koreya Milliy mudofaa universiteti o‘rtasida imzolangan memorandum alohida ahamiyat kasb etdi. O‘zbekiston Mudofaa vazirligining 20 nafardan ortiq ofitserlari turli yo‘nalishlarda tajriba almashish maqsadida Janubiy Koreya Qurolli Kuchlarining harbiy ta’lim muassasalarida tayyorgarlik o‘tab qaytdi.
Tadbir yakunida Janubiy Koreya Milliy mudofaa universiteti o‘qituvchilari akademiyada yaratilgan sharoitlar, uning infratuzilmasi bilan yaqinda tanishib, o‘quv xonalarida kursantlar bilan suhbatlashdi.
Eslatib o‘tamiz, joriy yilning 4—6-sentabr kunlari O‘zbekiston mudofaa vazirining tarbiyaviy va mafkuraviy ishlar bo‘yicha o‘rinbosari general-mayor Azizbek Ikromov boshchiligidagi Mudofaa vazirligi harbiy delegatsiyasi xavfsizlik va mudofaa masalalari bo‘yicha Janubiy Koreyada o‘tkazilgan “Seul muloqoti—2019” forumida ishtirok etgan edi. Tadbirlar davomida general-mayor Azizbek Ikromov Koreya Respublikasi Milliy mudofaa vaziri o‘rinbosari Pak Chje Min bilan ikki tomonlama uchrashuv o‘tkazgan.
Izoh (0)