“Ayritom” ko‘prigiga AQSh tomonidan taqdim etilgan radiatsiyani aniqlovchi uskuna o‘rnatildi

AQSh davlat energetika departamentining Milliy yadro xavfsizligi ma’muriyati O‘zbekiston Davlat bojxona qo‘mitasiga Afg‘oniston bilan chegaradagi “Ayritom” ko‘prigida radiatsiyani aniqlash uchun uskuna taqdim etdi. Bu haqda AQShning Toshkentdagi elchixonasi o‘zining Facebook’dagi sahifasida ma’lum qildi.

“Radiatsiyani aniqlovchi ushbu uskuna O‘zbekistonga muhim xalqaro chegara punktida radioaktiv material kontrabandasiga qarshi kurashda yordam beradi. U avtomobil va yo‘lovchilar, mobil deteksion tizimlar va qo‘l/portativ detektorlarni skanerdan o‘tkazuvchi radiatsion portal monitorlarni o‘z ichiga oladi”, — deyiladi xabarda.

Elchixonaning qayd etishicha, uskuna ko‘p yillik, ko‘p million dollarlik loyihaning birinchi fazasi bo‘lib, uning doirasida AQSh davlat energetika departamentining Milliy yadro xavfsizligi ma’muriyatiga qarashli yadro kontrabandasini aniqlash va ushlab qolish idorasi boshqa strategik chegara o‘tish punktlarini ham radiatsion portal monitorlari bilan jihozlaydi.