OAV: Alisher Usmonovga tegishli “Megafon” aloqa operatori Ucell’ni sotib oldi

Rossiyaning eng yirik aloqa operatorlaridan biri “Megafon” kompaniyasi O‘zbekistonning Ucell aloqa operatorini sotib oldi, deb Repost o‘z manbalariga asoslanib xabar beradi.

Biroq, Ucell kompaniyasining matbuot xizmati rahbari Baxtiyor Nasimov Repost muxbiriga ushbu ma’lumotlarni tasdiqlamagan. Bitim summasi haqida ham aniq ma’lumotlar yo‘q.

Xabarda qayd etilishicha, Ucell kompanisiya qayta tashkil qilish va jihozlash ishlari boshlab yuborilgan. Taxminlarga ko‘ra, Ucell nomi “Megafon”ga o‘zgartiriladi.

Ma’lumot uchun, Ucell Coscom brendi ostida 1996-yilda tashkil etilgan bo‘lib, 2007-yilning iyul oyidan TeliaSonera Coscom kompaniyasining asosiy aksiyadoriga aylandi. 2008-yilning iyun oyida Coscom operatori Ucell brendi ostida faoliyat boshladi. Bugungi kunga kelib, kompaniya abonentlari soni 7,1 millionni tashkil qiladi. Ucell 1 yil muqaddam Telia’dan 215 million dollarga O‘zbekiston Davlat raqobat qo‘mitasi tomonidan sotib olingandi.