Germaniyaning Volocopter (sobiq E-volo) startapi uchuvchisiz aerotaksi loyihasi uchun 50 million yevro jalb qildi. Bu haqda “VS.ru” xabar bermoqda.

Foto: Volocopter

Investitsiyalar borasida Geely va Volvo avto ishlab chiqaruvchilariga egalik qiladigan Xitoyning Zhejiang Geely Holding Group kompaniyasi yetakchilik qildi. Kelishuvda, shuningdek, loyihaning AQSh, Yevropa va Osiyodagi yangi va mavjud investorlari ham ishtirok etgan.

Mazkur muzokaralarning oxirgi raundini ham hisoblaganda Volocopter startapga asos solingan 2011-yildan beri 81 million yevro (jumladan, Intel va Daimler mablag‘lari ham) to‘plashga erishdi.

Volocopter jalb qilingan mablag‘larni 2021-yilgacha mo‘ljallangan aerotaksi tijoriy reyslarini ishga tushirishga tayyorgarlik uchun sarflaydi.

Shuningdek, kelishuv doirasida startap va Geely Xitoyda aerotransport uchun ekotizimni rivojlantiradigan qo‘shma korxonani yaratadi.

Joriy yil 21-avgust kuni Volocopter o‘zining ilk tijoriy aerotaksisi — VoloCity’ni taqdim etgandi. Kompaniya vakillariga ko‘ra, ushbu transport soatiga 110 kilometr tezlikda ikki kishini 35 kilometrgacha eltishi mumkin. Avgust oyi oxirida kompaniya Xelsinki aeroportida prototiplaridan birining sinov parvozini ham amalga oshirgandi.