Afg‘oniston shimolidagi Bog‘lon viloyatida joylashgan elektr uzatish tarmoq ustunlarida yuz bergan terakt oqibatida mamlakatning 11 viloyati elektr ta’minoti tizimida uzilish yuz berdi, deya xabar bermoqda ToloNews.
De Afghanistan Breshna Sherkat energetika kompaniyasi bayonotiga ko‘ra, O‘zbekistondan elektr quvvatini import qiladigan ikkita tarmoq ustuni yakshanba kuni jangarilar tomonidan portlatib, ag‘darilgan.
O‘z navbatida O‘zbekiston Energetika vazirligidan “Daryo”ga ma’lum qilishlaricha, Afg‘onistondagi elektr uzatish tarmoqlari portlatilgani haqida qo‘shni mamlakatdagi xaridorlardan hech qanday ma’lumot kelib tushmagan.
Afg‘onistonda elektr uzatish tarmoqlari (tarmoq ustunlari) portlatilgani haqida bizga Afg‘onistondagi xaridorlardan hech qanday ma’lumot yoki xabar kelib tushgani yo‘q. Mavjud shartnoma asosida Afg‘onistonga uzilishlarsiz elektr energiyasi yetkazilib bermoqda (bir sutkada taxminan 1,5 million KVt/soat).Elektr uzatish tarmoqlari, ya’ni havo liniyalarining tayanch ustunlariga yetkazilgan zararni, ularni ta’mirlash ishlarini har bir mamlakat o‘z hududida o‘zi amalga oshiradi.
Ayrim sabablarga ko‘ra ta’minoti uzilgan elektr tarmog‘i, taxminimizcha, Afg‘oniston iste’molchilari Tojikistondan xarid qiladigan havo liniyalarida sodir bo‘lgan bo‘lishi mumkin. Agar ushbu taxmin to‘g‘ri bo‘lsa, tojikistonlik va afg‘onistonlik mutaxassislar ta’mirlash ishlarini qachon va qay tartibda amalga oshirishidan bexabarmiz.
O‘zbekiston Energetika vazirligi matbuot xizmati
Izoh (0)