Toshkent viloyatida bir kunda 114 haydovchi temir yo‘l kesishmasidan o‘tish qoidalarini buzdi. Ularga 76 mln so‘mlik jarimalar qo‘llandi

Toshkent viloyatida temir yo‘l kesishmalariga yaqin joylashgan 38 ta korxona, 12 ta tashkilot, 47 o‘quv muassasasi va 31 mahallada profilaktik suhbatlar o‘tkazilib, bunday manzillardan o‘tish qoidalari bo‘yicha tushuntirishlar berildi. Bu haqda “Daryo”ga Toshkent viloyati IIBB YHXB matbuot bo‘linmasi ma’lum qildi.

Shuningdek, temir yo‘l kesishmalariga YHXB xodimlari biriktirilib, ularning holati ko‘rikdan o‘tkazildi. Ko‘rik davomida aniqlangan harakat xavfsizligiga rahna soluvchi kamchiliklarni bartaraf qilish yuzasidan tegishli tashkilotlarga taqdimnomalar kiritildi. Temir yo‘l kesishmalaridan elektropoyezdlarni o‘tish vaqtida harakat xavfsizligi ta’minlash ishlari olib borildi.

Tadbirlar davomida birgina 13-sentabr kuni temir yo‘l kesishmasidan o‘tish qoidalarini buzgan 114 nafar haydovchiga nisbatan ma’muriy bayonnoma rasmiylashtirildi.

Ularga nisbatan MJTKning 130-moddasi 1-qismiga asosan eng kam ish haqining 3 baravari (669 ming so‘m) miqdorida, jami 76 million 266 ming so‘mlik jarimalar belgilandi.