Yoshlar ittifoqi tizimida ishlovchi 1,5 ming xodimning avgust oyi maoshlari 16-sentabrdan boshlab to‘liq beriladi. Bu haqda Ittifoq axborot xizmati “Daryo”ga ma’lum qildi.
Avvalroq budjetdan mablag‘ ajratishdagi uzilishlar sababli Yoshlar ittifoqi tizimidagi yuzlab xodimlar avgust oyi uchun maoshlarini ololmayotgani haqida xabar berilgan edi. Ushbu holat yuzasidan Moliya vazirligi “Daryo”ga izoh berdi.
Vazirlikdan ma’lum qilishlaricha, Yoshlar ittifoq nodavlat notijorat tashkiloti bo‘lgani uchun davlat budjeti xarajatlari parametrlarida uni saqlash bilan bog‘liq xarajatlar uchun alohida mablag‘ ajratilishi nazarda tutilmagan.Tashkilotni saqlash xarajatlari, shu jumladan xodimlarning ish haqi xarajatlari yagona soliq to‘lovidan 4 foizlik ajratma hisobiga amalga oshirilishini inobatga olib, Yoshlar ittifoqi xodimlarining ish haqi kechiktirilishi masalasi Moliya vazirligiga bog‘liq emas.
Yoshlar ittifoqi Markaziy kengashi axborot xizmatining “Daryo”ga ma’lum qilishicha, Ittifoqning hududiy Kengashlari va tizim tashkilotlari xodimlari uchun to‘lanadigan maoshlar bo‘yicha muammo yo‘q.
13-sentabrdan boshlab tizimdagi barcha tashkilotlar uchun rejalashtirilgan mablag‘lar ajratila boshlangan va hududiy kengashlarga o‘tkazib beriladigan oylikning uchdan bir qismi o‘tkazib berilgan.
Ittifoqdan ma’lum qilishlaricha, tizimdagi tashkilotlarning barcha xodimlariga 16-sentabr, dushanbadan boshlab avgust oyi uchun ish haqlarini to‘liq to‘lab beriladi.
Izoh (0)