O‘zbekiston Markaziy banki moliyaviy ommaboplikni oshirish bo‘yicha Moliyaviy ommaboplik alyansi (AFI) a’zolari siyosatining asosiy yo‘nalishlarini aks ettiruvchi “Mayya deklaratsiyasi”ga qo‘shildi, deya xabar berdi bank matbuot xizmati.
Markaziy bank delegatsiyasi 11−13-sentabr kunlari Ruandada “Ayollar va yoshlarni jalb qilish uchun texnologiyalardan foydalanish” shiori ostida bo‘lib o‘tgan AFI yillik forumida deklaratsiyaga a’zo bo‘ldi. O‘zbekiston “Mayya deklaratsiyasi”ni qabul qilgan 78-davlat bo‘ldi.
Markaziy bank o‘ziga 2020-yil yanvariga qadar moliyaviy ommaboplikni oshirish Milliy strategiyasini ishlab chiqish majburiyatini oldi. U lahzalik to‘lov tizimlarini joriy etish, shaxslar kimligini masofadan aniqlashni yo‘lga qo‘yish va ta’limiy saytlarni ishga tushirishni o‘z ichiga oladi.
AFI’ning to‘rtinchi yillik umumiy yig‘ilishida “Aholining alohida guruhlari uchun moliyaviy integratsiyani jadallashtirish” Kigali bitimi, elektron pullar sohasidagi moliyaviy siyosat modeli va moliyaviy ommaboplikning asosiy ko‘rsatkichlari to‘plami bo‘yicha modellar ko‘rib chiqildi va tasdiqlandi.
AFI — dunyoning 90 ga yaqin rivojlanayotgan davlatlarining moliyaviy organlari boshqaruvchilarini birlashtirgan xalqaro tashkilot. Alyansning asosiy vazifasi aholiga moliyaviy xizmatlar ko‘rsatilishini kengaytirish bo‘yicha choralarni ishlab chiqishdan iborat. O‘zbekiston o‘tgan yilning avgustida AFI a’zosiga aylandi.
Izoh (0)