Boks bo‘yicha JCh. Zoirov va Qahramonov keyingi bosqichda, Elnur Abduraimov esa musobaqa bilan xayrlashdi

Rossiyaning Yekaterinburg shahri mezbonlik qilayotgan boks bo‘yicha Jahon chempionatining navbatdagi kunida 3 nafar o‘zbekistonlik bokschi ringga ko‘tarildi.

Dastlab -52 kg vazn toifasi vakili Shahobiddin Zoirov musobaqadagi ikkinchini jangini o‘tkazdi. Unga bu jangda Dominikan respublikasi vakili Rodrigo Martega raqiblik qildi. Zoirov ushbu jangda katta ustunlik bilan g‘alaba qozondi — 5:0.

So‘ngra ringga -75 kg vaznda O‘zbekiston sharafini himoya qilayotgan Fanat Qahramonov ringga ko‘tarildi. 1/16 final bahsida Fanatga avstraliyalik Adrian Kammarano raqiblik qildi. Qahramonov ham xuddi Zoirov kabi raqibini 5:0 hisobida mag‘lub etib, keyingi bosqichga chiqdi.

Kunning so‘nggi jangida esa -63 kg vaznda ringga chiqayotgan Elnur Abduraimov ishtirok etdi. Elnur amerikalik Keyshovn Devisga 0:5 hisobida yutqazib, musobaqa bilan xayrlashdi. Qayd etish joiz, Elnur jang davomida nokdaun holatini ham boshdan o‘tkazdi.

Shu tariqa 14-sentabr kungi janglarda ikki nafar o‘zbekistonlik bokschi keyingi bosqichga chiqqan bo‘lsa, bir nafari musobaqa bilan erta xayrlashishga majbur bo‘ldi.