“Toshkent—Andijon” poyezdi elektr ta’minotidagi uzilish sabab Angrenda salkam bir soat qolib ketdi

“Toshkent—Andijon” yo‘nalishida harakatlanayotgan 60-sonli yo‘lovchi poyezdi 13-sentabr kuni soat 9:25 da Angren vokzalida 50 daqiqaga to‘xtab qolgan.

“O‘ztemiryo‘lyo‘lovchi” kompaniyasining “O‘zbekiston temir yo‘llari” saytida e’lon qilingan bayonotiga ko‘ra, bunga “tashqi elektr tarmog‘ida yuzaga kelgan nosozlik sabab bo‘lgan”.

“Ko‘rilgan chora-tadbirlar tufayli yuzaga kelgan nosozlik bartaraf qilinib, temiryo‘lga yetkazib berilayotgan energiya ta'minoti tiklandi. Ayni daqiqada elektropoyezdlarning muntazam harakati yo‘lga qo‘yilgan”, — deyiladi temiryo‘l kompaniyasi axborotida.

Yuz bergan hodisa munosabati yo‘lovchilarga keltirilgan noqulayliklar uchun “O‘ztemiryo‘lyo‘lovchi” kompaniyasi yo‘lovchilardan uzr so‘ragan.