O‘zbekiston Tashqi ishlar vaziri Abdulaziz Komilov 13-sentabr kuni Fransiya elchisi etib tayinlangan Izabel Servoz-Galluchchini qabul qildi.
Vazirlik matbuot xizmatining xabar berishicha, ishonch yorliqlari nusxalarini qabul qila turib, vazir elchini tayinlov bilan qutladi va unga omad tiladi.
Bo‘lib o‘tgan suhbatda ko‘p qirrali O‘zbekiston—Fransiya muloqotini sifat jihatdan yangi darajaga ko‘targan 2018-yilda Fransiyaga rasmiy tashrif doirasidagi Prezident Shavkat Mirziyoyevning prezident Emmanuel Makron bilan olib borgan muzokaralari chog‘ida erishilgan kelishuvlarni amalga oshirish masalalariga muhim e’tibor qaratilgan.
Siyosat, iqtisod, turizm, madaniyat va ta’lim kabi sohalardagi o‘zaro hamkorlikni yanada rivojlantirishdan tomonlarning manfaatdorligi tasdiqlangan. Shuningdek, o‘zaro savdo hajmlarini oshirish va qo‘shma investitsiya loyihalarini amalga oshirish istiqbollari muhokama qilingan.
Fransiyaning O‘zbekistondagi avvalgi elchisi Violen Biyet de Vilmor avgustda diplomatik missiyasini yakunlagan edi.
Izoh (0)