Oliy Majlis Qonunchilik palatasi deputatlari 12-sentabr, payshanba kuni Nozim Husanov nomzodini O‘zbekiston bandlik va mehnat munosabatlari vaziri lavozimiga ma’qulladi. Nomzod Prezidentning tegishli farmoni imzolanganidan so‘ng tasdiqlanadi.
Vazirlikning avvalgi rahbari Sherzod Kudbiyev avgust oyi oxirida Prezidentning davlat xizmati va hokimiyat vakillik organlari bilan hamkorlik qilish masalalari bo‘yicha maslahatchisi lavozimiga tayinlangan edi.
Nozim Husanov (1976-yil tug‘ilgan) Toshkent avtomobil-yo‘llar instituti (1997), Toshkent moliya instituti (sirtqi bo‘lim, 2002), Prezident huzuridagi Davlat va jamiyat qurilishi akademiyasi (2007) bitiruvchisi hisoblanadi. U 2018-yil may oyidan buyon Toshkentning Sergeli tumaniga hokimlik qilib kelayotgan edi.
Eslatib o‘tamiz, O‘zbekiston Konstitutsiyasiga 2019-mart oyida kiritilgan tuzatishga ko‘ra, Oliy Majlis Qonunchilik palatasi vakolati kengaytirilgan. Jumladan, deputatlar Vazirlar Mahkamasi a’zoligiga nomzodlarni ko‘rib chiqadi va ma’qullaydi. Vazirlar Mahkamasi a’zolari Prezident tasdig‘idan so‘ng o‘z majburiyatlarini bajarishga kirishadi.
Izoh (0)