Trampning reytingi amerikaliklar orasida Xitoy bilan savdo mojarosi sabab tushib ketdi

AQSh prezidenti Donald Trampning reytingi Xitoy bilan savdo mojarosi oqibatida narxlarning ko‘tarilishi va retsessiya (iqtisodiy o‘sishning sekinlashishi) sabab 38 foizga tushib ketdi, deb xabar beradi “RBK”.

ABC telekompaniyasi va The Washington Post gazetasining buyurtmasi asosida o‘tkazilgan so‘rov natijalariga ko‘ra, 56 foiz odam Amerika yetakchisining Xitoy bilan savdo urushiga oid siyosatini yoqlamaydi, 35 foizi esa qo‘llab-quvvatlaydi — bu so‘rovda yetakchilar faolligining eng past ko‘rsatkichidir.

Telefon so‘rovlari 2—5-sentabr kunlari o‘tkazilgan bo‘lib, 1003 nafar odam bilan bog‘lanilgan. Hisob-kitoblardagi taxminiy xatolik 3,5 foizga teng.

Iyul oyida Trampning reytingi rekord darajadagi 44 foiz ko‘rsatkichga yetgan edi. O‘shanda bu kabi o‘sish Trampning muvaffaqiyatli iqtisodiy siyosatiga bog‘langandi.

Yoz o‘rtalarida so‘rovda ishtirok etgan odamlarning 42 foizi AQSh prezidentining soliq borasidagi siyosatini samarali deya baholagan bo‘lsa, tashqi siyosatini 40 foizi ma’qullagan. Trampning ekologik masalalar bo‘yicha qarorlari eng kam — 29 foiz so‘rov ishtirokchilari ijobiy qabul qilgan edi. Aprel oyida esa Trampning mashhurligi amerikaliklar orasida 37 foizni tashkil etgandi.