Toshkent viloyati hokimi: “Paxtani 10 kun kech terib olsak ham, ijtimoiy soha xodimlari terimga olib chiqilmaydi”

Nurafshon shahrida 9-sentabr kuni Toshkent viloyati hokimi vazifasini bajaruvchi Rustam Xolmatov raisligida o‘tkazilgan yig‘ilishda paxta yig‘im-terimini uyushqoqlik bilan o‘tkazish, bunda ijtimoiy soha vakillarini terimga jalb qilish holatiga mutlaqo yo‘l qo‘ymaslik yuzasidan yana bir bor barcha rahbarlar qat’iy ogohlantirildi.

“Hosilni 10 kun erta yoki 10 kun kech yig‘ishtirib olarmiz — bularning hammasi bo‘ladigan ishlar. Ammo davlatimizni butun dunyoga sharmanda qiladigan xatoga yo‘l qo‘yishga mutlaqo haqimiz yo‘q. Kimki o‘zboshimchalik bilan bunga yo‘l qo‘ysa, hozirgi siyosatga xiyonat qilgan bo‘ladi”, — deya hokimning so‘zlaridan iqtibos keltirmoqda viloyat hokimligi matbuot xizmati.

Avvalroq Sirdaryo viloyati hokimi G‘ofurjon Mirzayev viloyatda paxta yig‘im-terimi mavsumida majburiy mehnatga yo‘l qo‘yilmasligini ma’lum qilgan edi. Andijon viloyati hokimi Shuhrat Abdurahmonov esa paxta terimiga birorta budjet tashkiloti xodimini yaqinlashtirmaslikka qasam ichgan edi. “Undan ko‘ra, paxta dalada qolsa qolib ketsin. Qolmaydi, albatta. Hammasini teramiz. Lekin budjet tashkilotlari bilan emas”, — degandi Andijon rahbari.

Ma’lumot uchun, Prezident Shavkat Mirziyoyev 12-avgust kuni bo‘lib o‘tgan videoselektor yig‘ilishida hokimlarga “bu yil paxta terimiga maktab, institut — umuman, birorta budjet tashkiloti xodimlari olib chiqilmasligi”ni eslatib o‘tgan edi; 13-avgust kuni esa davlat rahbari tadbirkorlarni qishloq xo‘jaligidagi mavsumiy ishlarga jalb etishni taqiqlashni nazarda tutuvchi farmonni imzolagan.