Rossiyaning “Donguz” poligonidagi harbiy shaharchaga O‘zbekiston davlat bayrog‘i o‘rnatildi

Avvalroq, O‘zbekiston Mudofaa vazirligi harbiy xizmatchilari 16—21-sentabr kunlari Rossiyada bo‘lib o‘tadigan “Markaz – 2019” strategik qo‘mondonlik-shtab o‘quv mashg‘ulotlarida ishtirok etishi haqida xabar berilgandi. O‘zbekistonlik harbiylar ushbu harbiy strategik mashg‘ulotlarda qatnashish uchun Rossiyaning Orenburg viloyatidagi “Donguz” poligonida qad ko‘targan vaqtinchalik harbiy shaharchaga yetib kelib, o‘zlari uchun ajratilgan chodirlarga joylashdi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.

Poligondagi harbiy shaharchaga O‘zbekiston davlat bayrog‘i o‘rnatildi.

“Kun tartibi bo‘yicha harakat qilayotgan vakillarimiz birinchi kuni o‘zlari uchun ajaratilgan hududni ko‘zdan kechirib, dala sharoitida yaratilgan harbiy shaharcha bilan tanishdi. Guruh rahbarlari tomonidan yana bir bor texnika xavfsizlik qoidalari eslatib o‘tildi”, — deyiladi xabarda.

O‘sha kuni o‘zbekistonlik harbiy oshpazlar tomonidan o‘zbek milliy taomi – osh damlandi. Qolgan kunlari esa dala sharoitida belgilangan taomnoma asosida ish ko‘rishadi.

Eslatib o‘tamiz, ushbu strategik qo‘mondonlik-shtab o‘quvlarida sakkiz mamlakat – Rossiya, Qozog‘iston, Xitoy, Pokiston, Hindiston, Tojikiston, Qirg‘iziston va O‘zbekistonning harbiy kontingenti ishtirok etadi.