Oliy Majlis deputatlari mashinalarning orqa yon oynalaridagi pardalar masalasida IIVga so‘rov kiritdi
Buxoro shahar ma’muriy sudi avtomobillarning orqa yon oynalariga pardalar o‘rnatish mumkinligi to‘g‘risida qaror chiqargani haqida 6-sentabr kuni ijtimoiy tarmoqlarda xabarlar tarqalgan edi. 8-sentabr kuni esa Ichki ishlar vazirligi Yo‘l harakati xavfsizligi bosh boshqarmasi ushbu xabarlarga munosabat bildirib, yengil avtomobillarning orqa yon oynalariga parda taqish mumkin emasligi, ijtimoiy tarmoqlarda tarqatilgan xabarlarni asossiz deb hisoblashini ma’lum qildi.
O‘z navbatida, Oliy Majlis Qonunchilik palatasi deputati Rasul Kusherbayev YPX inspektorlari haydovchilarning orqa eshikka parda o‘rnatgani uchun jarima qo‘llashni bas qilishlari kerak, deb hisoblaydi. U 8-sentabr kuni ijtimoiy tarmoqlarda qoldirgan postida bir guruh deputatlar bu masalada O‘zbekiston Ichki ishlar vazirligiga so‘rov yo‘llaganini bildirgan.
Avvalroq bir guruh deputatlar haydovchilarga avtomobillarning old oynasidan tashqari barcha oynalariga o‘zlariga qulay holda parda taqishlariga ruxsat berish bo‘yicha hukumatga so‘rov bilan chiqqandik. Natija o‘zingizga ma’lum... Shunga qaramay bu borada sudning pozitsiyasi biz uchun ham muhim edi.
Foto: Facebook/Rasul Kusherbayev
Nihoyat kuni kecha Buxoroda ma’muriy sud haydovchilar orqa eshikka parda o‘rnatganligi uchun YHX inspektori tomonidan qo‘llanilgan jarimani bekor qilib, orqa eshikka parda o‘rnatishni qonuniy deb topgani ma’lum bo‘ldi.
Kecha esa, qo‘shimchasiga, yana xuddi shunday yangilikdan xabar topdim: shu yilning 6-avgust kuni Farg‘ona viloyatining Toshloq tumani ma’muriy sudi ham haydovchining shikoyatini qanoatlantirib, orqa eshiklarga parda taqishni qonuniy deb topgan va jarima jazosini bekor qilgan.
Ko‘rinib turibdiki, sudlarimiz bu masalada yagona qonuniy yondoshuvda ketmoqda.
Ko‘plab saylovchi, bloger va faollarning murojaatlari va yuqoridagilardan kelib chiqib aytsak, avtomobillarning orqa eshiklariga parda taqish 100 foiz qonuniydir.
Shu bois, O‘zLiDeP fraksiyasidagi va boshqa bir guruh hamkasb deputatlar bilan kuch birlikda, degan tamoyilga amal qilib, odamlarni sudga ovora qilib vaqtlarini yo‘qotmasliklari uchun Ichki ishlar vazirligiga barcha YHX inspektorlarining avtomobil orqa eshiklariga parda taqqanlik uchun haydovchilarni jarimaga tortish amaliyotiga butunlay chek qo‘yish talabi bilan so‘rov kiritishga qaror qildik.
Qonunlar va xodimlar adolat uchun xizmat qilsin doimo.
Rasul Kusherbayev, Oliy Majlis Qonunchilik palatasi deputati
Izoh (0)