Oliy Majlisi Qonunchilik palatasi deputati Akmal Umrzoqov Facebook’dagi sahifasi orqali deputatlikka nomzodini qo‘ymoqchi bo‘lgan blogerlarni tanqid qildi. Deputat postini o‘chirib yuborgan. Bloger Dima Qayum esa uning bu mulohazalarini ko‘chirib olib, o‘z sahifasida e’lon qildi.
Deputatlikka nomzod qo‘ysam o‘taman, deb fikrlaydigan keti toza bloger-u, birovni haqini yeyishdan uyalmaydigan pechkachi va o‘ziga o‘zi ‘smartgov konsultant’ deydiganlar ko‘payib ketdi. Qiziq nomzodlarning turlari... Hamma xilidan borey...Hattoki, bir ‘aqlli’ buxorolik nima emish, deputatlik dasturini yozgandim, deydi. Ahad Qayummi, lahad luqummi bu bloger, farqi yo‘q, bu masxarabozlarga... Deputat manifest yozadimi hech bir dunyoda. Yana umidim so‘nib boryapti, men g‘alaba qilolmaymanmish. O‘zingcha 13 000 podpischik (shundan yarmi soxta akkaunt, yarmi allaqachon deleted bo‘lgan) dunyoni har bir burchagidan yig‘ilib, senga muxlis bo‘lgani ketingni ko‘tardimi deyman. Saylanish uchun kamida bilasanmi qancha saylovchi bo‘lish kerak bir okrugda havasmand nomzod?! O‘tgan saylovda o‘rtacha 165 000 edi. Fikr qil, bu raqam sening kanalingdagi obunachilardan kamida o‘n ikki marta ko‘p va kamida shularning yarmi seni yoqlashi kerak.Sal, tush eshagingdan. Eh, saylov nima bilmaysan-da. Ota-onangga emas, o‘ynashiga, onang ideali uchunmas, dadang yomon ko‘rgan qo‘shniga ovoz beradi. Amakivachchang, xolavachchang nega u endi nomzod bo‘libdi, mening bolamni nimasi kam undan, deydi hasad aralash. Saylov uchastkasi joylashgan maktablarda esa, ‘kelajak bunyodkorlari’ besh yilda bir hosil yig‘adi.
— Anaqqisa uka, man siz tomonga hammani og‘dirib berardim, deydi og‘zidan vino hidi anqib uchastka kommissiyasi raisi bo‘lgan o‘zini lokatsiyasini unutgan geografiya o‘qituvchisi. U bu gapni har beshala nomzodga aytib, saylov o‘tguncha ‘gayguy’ qilib yashaydi. U rais o‘zicha quv, o‘zicha shustriy bo‘ladi. Saylov o‘tguncha kunora otib qolib, maza qilib yashaydi ‘demokratiya’ sahnasida.
Saylov ko‘rmagan kimlardir esa o‘zicha deputat bo‘lsam, dunyoni teskari aylantiraman, degancha o‘y-xayol suraveradi. Aytgancha, deputatlik bu mansab, martaba, rutba emas. Hozirdan nomzodimni o‘tkazishmayapti, deb jar solmang o‘zicha ‘publikaga’ o‘ynaydiganlar.
Alloh nazar qilmasa, sen o‘zingni ‘smartgov’ bo‘yicha mutaxassis deysanmi yoki boshqa eshak bozorga ham dallol bo‘lmaysan. Parlament sirkka aylanishiga yo‘l qo‘ymaydi bu zakiy xalq. Yo‘l qo‘ymasin ham ilohim.
Akmal Umrzoqov, Oliy Majlisi Qonunchilik palatasi deputati
Akmal Umrzoqov 2018-yil dekabrida propiska rejimini oqlab chiqqan va uning bekor qilinishi jinoyatchilik ko‘payib ketishiga olib kelishi mumkinligini ta’kidlagandi.
Ma’lumot uchun, Akmal Umrzoqovning postini e’lon qilgan, ijtimoiy tarmoqlarda Dima Qayum taxallusi bilan ijod qiluvchi rishtonlik Dilshod Boltaboyev bu yil deputatlikka o‘z nomzodini qo‘yishga bel bog‘lagan. Dilshod Boltaboyev savdo-sotiq bilan shug‘ullanadi, u sotadigan asosiy mahsulot pechka hisoblanadi.
Izoh (0)