Germaniyalik advokat Yan Shtro “Kim millioner bo‘lishni xohlaydi?” teleshousida ishtirok etish uchun 15 yil tayyorgarlik ko‘rdi va bosh sovrin — bir million yevro yutib oldi. Bu haqda The Guardian xabar bermoqda.

Foto: The Guardian

Ma’lum bo‘lishicha, 35 yoshli Yan Shtro, hatto Gamburgdagi uyi yerto‘lasida studiyaning nemischa variantini yaratgan. Shouning uyda yaratilgan variantida musiqa va chiroqlar effekti ham bo‘lgan.

U teleshouda qatnashish uchun bir necha marta so‘rovnoma yuborgan, ammo har gal rad javobini olgan. Nihoyat omadi chopib, shouda ishtirok etish taklifini olgan.

Shtroning aytishicha, u shu paytgacha uzatilgan 1407 ta sondan birortasini o‘tkazib yubormagan. O‘spirinlik paytida shouni tomosha qilish uchun, hatto oilaviy tadbirlarga ham bormagan. Shundan so‘ng savollar va javoblarni batafsil tahlil qilib, iloji boricha ko‘proq ma’lumotlarni eslab qolishga uringan. Shuningdek, do‘stlarini uyiga taklif qilib, turli viktorinalar uyushtirgan.

“Deyarli 16 yil vaqtimni o‘z viktorinam asosida barcha musiqiy effektlari bilan shou tashkil etishga sarflaganim, shubhasiz, menga foyda keltirdi”, — degan Shtro. G‘olibning aytishicha, teleshouda o‘zini uyida o‘tkaziladigan oddiy viktorinada o‘ynayotgandek tasavvur qilishga harakat qilgan va 500 yevrolik savolga javob berganidan keyingina xotirjam tortgan.