Qozog‘iston Parlamenti Majlisi (quyi palatasi) yangi sessiya boshlanishi bilan o‘z ishida lotin grafikasiga asoslangan qozoq alifbosidan foydalanishni boshlaydi. “TASS”ning yozishicha, bu haqda palata matbuot xizmati ma’lum qilgan.
“Majlisdagi yangi sessiya yana bir muhim voqea bilan o‘ziga xos bo‘ldi: Majlis lotin alifbosiga o‘tmoqda. Binodagi barcha yozuvlar va yalpi majlisda so‘zga chiqqan deputatlarning ismlari lotinchada yozilgan”, — deyiladi xabarda. Ammo quyi palata saytining qozoq tilida keltirilgan ma’lumotlar bo‘limi hozircha kirillda yozilgan.
Qozog‘istonning birinchi prezidenti Nursulton Nazarboyev 2017-yilning 26-oktabrida Qozog‘iston alifbosini kirilldan lotinga o‘tkazish to‘g‘risidagi farmon imzolagan edi. Hukumatga lotin alifbosiga 2025-yilgacha bosqichma-bosqich o‘tishni ta’minlash topshirilgan.
Yangi alifbo 32 ta harfdan iborat bo‘ladi, shuningdek, diakritik belgilar (harflar ustidagi belgilar) kiritiladi.
Qozog‘istonda qozoq tili davlat tili hisoblanadi. Ayni paytda kirill grafikasiga asoslangan alifbodan foydalanilmoqda. Shuningdek, respublika Konstitutsiyasiga muvofiq, davlat muassasalarida va mahalliy o‘zini-o‘zi boshqarish organlarida qozoq tili bilan teng ravishda rus tilidan ham rasman foydalaniladi.
Izoh (0)