Mustaqillikning 28 yilligi munosabati bilan Namangan shahridagi ANAMED diagnostika markazi direktori Nosirbek Abdullaxonov “Do‘stlik” ordeni bilan taqdirlangandi. U ushbu orden uchun berilgan 7 million so‘m pul mukofotini o‘zi ta’lim olgan maktabga taqdim etdi. Bu haqda “Daryo”ga jurnalist Sanjarbek Hamidov ma’lum qildi.
Nosirbek Abdullaxonov 4-sentabr — Bilimlar kuni qadrdon dargohi, Namangan shahridagi Mahmud Salohiddinov nomidagi 4-umumta’lim maktabida bo‘ldi. Bu inson o‘z vaqtida matematika fanlari doktori, O‘zFA prezidenti va akademigi bo‘lib, Nosirbek Abdullaxonovning tog‘asi edi.
Maktab nomi shu yerda o‘qigan akademik sharafiga qo‘yilgan bo‘lib, mazkur fan bo‘yicha chuqurlashtirilgan tarzda bilim beriladi.
Tantanali tadbirda so‘z olgan “Do‘stlik” ordeni sohibi bugun tibbiyot va tadbirkorlik sohasida qo‘lga kiritayotgan muvaffaqiyatlari uchun maktabda ta’lim bergan ustozlariga minnatdorchilik bildirdi.
Davlat ordeni uchun berilgan 7 million so‘m pul mukofotini maktab moddiy-texnika bazasini mustahkamlash, o‘quvchilar uchun yangi badiiy kitoblar va o‘quv qurollari sotib olish uchun taqdim qildi.
Izoh (0)