Namangan viloyati hokimi Xayrullo Bozorov viloyatdagi 775 ta mahalla raisi bilan uchrashdi. Bu haqda “Daryo” muxbiri Azizbek Abduvaliyev xabar bermoqda.
Namangan shahridagi “Afsonalar vodiysi” bog‘i amfiteatrida bo‘lib o‘tgan muloqotda hokim mahallalarda jinoyatchilikning oldini olish, ajrimlarni kamaytirish, tadbirkorlikni rivojlantirish va yangi ish o‘rinlari yaratish, “bir mahalla — bir mahsulot” tamoyili asosida ularni ixtisoslashtirish kabi masalalarga to‘xtalib o‘tdi.
Xayrullo Bozorov mahalliy hokimliklarning mahalla raislari bilan hamkorligi yetarli bo‘lmayotgani, bu esa hududlarda muammolar hal etilmasligiga olib kelayotganini tanqid qildi. Endi viloyatdagi mahalla raislari bilan shaxsan o‘zi muloqot qilishi, buning uchun Telegram tarmog‘ida alohida guruh tashkil etilishi, har bir mahalla raisiga esa yangi smartfon sovg‘a qilinishini bildirdi.
— Endi mahallangizda yechilmayotgan har qanday muammo, tezkor hal qilinishi lozim bo‘lgan har bir masala bo‘yicha to‘g‘ri menga murojaat qilishingiz mumkin. ‘Tadbirkorlik qilaman, ish o‘rni yarataman, loyiham bor, kredit kerak’, degan tadbirkorlar, fuqarolarni toping, bu haqda ham menga ma’lum qiling. Mahalla raislari aholiga ish topib berish bo‘yicha tashabbuskor bo‘lishi kerak, — dedi Xayrullo Bozorov.
Uchrashuvda faol mahalla raislariga viloyat hokimligi tashakkurnomalari va sovg‘alari topshirildi. Yig‘ilganlar uchun bayram dasturxoni yozildi.
Izoh (0)