Polsha 2024-yilga kelib Rossiya gazidan butunlay voz kechadi. “Korrespondent.net”ning xabar berishicha, bu haqda Polsha hukumatining strategik energiya infratuzilmasi bo‘yicha vakili Petr Naimskiy ma’lum qilgan.
“Besh yildan so‘ng, ya’ni 2024-yilda bizda Norvegiyadan foydalanishga tayyor Baltic-Pipe gaz quvuri bo‘ladi, Svinouyssedagi terminal 50 foizga kengaytiriladi. Rossiyaning gaz yetkazib berishidan butunlay ozod bo‘lamiz”, — degan Naimskiy.
Uning so‘zlariga ko‘ra, Polsha gazni Qatar va AQShdan oladi, mamlakatda Slovakiya va Litva bilan tizimlararo birlashmalar o‘rnatiladi, shuningdek, Ukraina bilan shartnoma imzolash ko‘zda tutilgan.
Petr Naimskiy bu nafaqat Polsha, balki Markaziy Yevropa uchun ham gaz yetkazib sohasini yaxshilanishiga olib kelishini aytgan.
Eslatib o‘tamiz, Rossiya va Polsha 2022-yilgacha gaz etkazib berish bo‘yicha uzoq muddatli shartnoma imzolagan. Bu muddat o‘tgach, Varshava Rossiya gazini AQSh gaziga almashtiradi.
Izoh (0)