“Daryo”ga Qashqadaryo viloyatining Chiroqchi tumanida faoliyat yurituvchi fermer Alisher Pardayevdan murojaat kelib tushdi. Fermerning gapiga ko‘ra, “Don xalq rizqi” AJ faoliyati tugatilgan fermer bilan shartnoma imzolab, undan don qabul qilgan. Oqibatda g‘alla yetishtirishgacha bo‘lgan muddatda barcha ishni bajargan fermerning mehnati havoga uchmoqda. Don uchun to‘lanadigan mablag‘ bugungi kunga kelib o‘zgalar cho‘ntagini qappaytirmoqda.
Fermer murojaatini o‘rganish maqsadida “Daryo” muxbiri Chiroqchi tumanining “Buronjuz” qishlog‘ida bo‘ldi.
— 2019-yil yanvar oyida 212,7 gektar yer olib, “Dursun ilg‘ori” fermer xo‘jaligini tashkil qildik, — deydi fermer Alisher Pardayev. – Menga berilgan 212,7 gektar yer maydoni ilgari 4 ta fermerga qarashli bo‘lgan. 2019-yil boshidagi optimallashtirish davrida 4 ta fermer xo‘jaligi faoliyati ham tugatilib, bugungi kunda pudratchi sifatida mening fermer xo‘jaligim tarkibida faoliyat yuritmoqda. Menda pudratchi sifatida ish olib borayotgan “Amir hoji ota o‘g‘illari” fermer xo‘jaligi 2019-yil 24-yanvar kuni Chiroqchi tuman hokimi qaroriga muvofiq faoliyati tugatilgan bo‘lsa-da, 2019-yil 22-fevral kuni “Don xalq rizqi” AJ bilan don yetkazib berish to‘g‘risida shartnoma tuzib, iyun oyida 13,6 tonna g‘alla topshiryapti. Don tashkiloti ham faoliyati tugatilgan fermer bilan shartnoma tuzib, undan don qabul qildi. Natijada shuncha mehnat qilgan va davlatning soliq majburiyatlarini bajarib kelgan faoliyati qonuniy fermer bo‘lsam-da, pulimni ololmay sarsonman. “Don” Sizdan g‘alla qabul qilmaganmiz degan bahona bilan pulimni to‘lab bermayapti.
Surishtiruvlarimizdan ma’lum bo‘lishicha, “Amir hoji ota o‘g‘illari” fermer xo‘jaligi faoliyati 2019-yil 24-yanvar kuni Chiroqchi tuman hokimi Rustam Jo‘raqobilov qaroriga muvofiq tugatilgan va unga tegishli 50,3 gektar yer tuman hokimligi zaxira yer fondiga qaytarilgan. Hamda bir kun ilgari — 2019-yil 23-yanvar kuni yangi tashkil etilgan “Dursun ilg‘ori” fermer xo‘jaligi tarkibiga qo‘shib berilgan. Ajablanarlisi, “Amir hoji ota o‘g‘illari” fermer xo‘jaligining faoliyati yanvar oyining 24-sanasida tugatilsa-da, 2019-yil 22-fevral kuni “Don xalq rizqi” AJ bilan 20 gektar yer maydonidan 6 tonna don va arpa yetkazib berish bo‘yicha sharnoma imzolayapti. Shu yerda yana bir e’tiborni tortadigan jihat bor. “Amir hoji ota o‘g‘illari” fermer xo‘jaligi tugatilmasdan unga tegishli yer, faoliyati tugatilgan 3 ta fermer xo‘jaligi yeri bilan birga 212,7 gektar qilinib, “Dursun ilg‘ori” fermer xo‘jaligi tarkibiga qo‘shib berilgan. Vaholanki, “Amir hoji ota o‘g‘illari” fermer xo‘jaligi faoliyati 24-yanvar kuni tugatilgan. “Dursun ilg‘ori” fermer xo‘jaligiga esa yer 23-yanvar kuni “hadya” qilib bo‘lingan.
Aniqlanishicha, faoliyati 2019-yil 24-yanvar kuni tugatilgan fermer xo‘jaligi iyun oyida “Don xalq rizqi” AJga 13,6 tonna g‘alla topshirgan.
Qiziq, “Don xalq rizqi” AJ qanday qilib faoliyati tugatilgan fermer xo‘jaligi bilan shartnoma imzolayapti? Nega undan don qabul qildi? Yoki “Don xalq rizqi” AJning faoliyati tugatilgan fermer xo‘jaliklari bilan ham shartnoma imzolashi odatiy holmi? Mazkur savollarga javob bergan “Don xalq rizqi” AJ yuristi Jasur Shopsanov hamda agronom Shahboz Saidovlar faoliyati tugatilgan fermerdan don qabul qilinishiga asos 2018-yil fermer xo‘jaligi bilan tuzilgan shartnoma ekanligini aytmoqda. 2019-yil fevral oyida tuzilgan yangi shartnoma esa mazkur fermer xo‘jaligi faoliyati tugatilganligidan bexabar bo‘lganliklari bois kelib chiqqan anglashilmovchilik ekanligini aytmoqda. Tashkilot agronomi va bevosita fermer xo‘jaliklari bilan shartnomalar tuzishga mas’ul Shahboz Saidov bu borada “Dursun ilg‘ori” fermer xo‘jaligi rahbarini ham ayblamoqda.
— “Dursun ilg‘ori” fermer xo‘jaligini tashkil etish haqida Chiroqchi tuman hokimining 2019-yil 24-yanvar kuni qarori chiqqan va qarorda yangi tashkil etilgan fermer xo‘jaligi rahbari Alisher Pardayevning 5 kun muddat ichida bajarishi lozim bo‘lgan vazifalari sanab o‘tilgan, — deydi Shahboz Saidov. — Ana shu talablar ichida don tashkilotiga tugatilgan fermer xo‘jaligi uning tarkibiga qo‘shilganligini ma’lum qilib, yangi shartnoma tuzish vazifasi ham bo‘lgan. Ammo ming afsuski, Alisher Pardayev buni bajarmagan. Shuning uchun biz ham “Amir hoji ota o‘g‘illari” fermer xo‘jaligi faoliyati tugatilganligidan bexabar qolganmiz.
Chiroqchi tuman hokimligi matbuot xizmatining tuman yuristiga tayanib xabar berishicha, “Don xalq rizqi” AJga yil boshida tumanda faoliyati tugatilgan fermer xo‘jaliklari va ayni kunda faoliyat yuritayotgan fermer xo‘jaliklari haqida ma’lumot berilgan. Hokimiyat yuristining fikricha, “Don xalq rizqi” AJ yuristi va agronomi bu yerda o‘zlarining noqonuniy xatti-harakatini oqlash uchun tuman hokimligini aybdor qilishga urinmoqda.
— Tuman hokimligi faoliyati tugatilgan fermer xo‘jaliklari haqida ma’lumot bermagan bo‘lsa, unda “Don xalq rizqi” AJ nega faoliyati tugatilgan boshqa fermer xo‘jaliklari bilan ham tasodifiy tarzda shartnoma imzolamagan ekan, nega endi faqatgina “Amir hoji ota o‘g‘illari” fermer xo‘jaligi bilan shartnoma tuzilgan? – deya hokimlik yuristining gaplarini keltiradi matbuot xizmati rahbari Sobit Raimqulov. — Demakki, tuman hokimligi bu haqda ma’lumot bergan ekan-da.
Ma’lum bo‘lishicha, faoliyati tugatilgan “Amir hoji ota o‘g‘illari” fermer xo‘jaligi va “Don xalq rizqi” AJ o‘rtasida 2018-yil 20-sentabr kuni 7 gektar suvli maydondan 17,5 tonna g‘alla topshirish bo‘yicha shartnoma imzolangan. “Don xalq rizqi” AJ yuristi va agronomi sal avvalroq don qabul qilishga ushbu shartnomani asos qilib keltirgandi. Demakki, don tashkiloti rahbariyati suvli maydondan g‘alla topshirishni nazarda tutuvchi shartnomaga ko‘ra lalmi maydondan 13,6 tonna g‘alla qabul qilavergan bo‘lib chiqadimi? Bu “Don xalq rizqi” AJ mas’ullarining ishga bo‘lgan e’tibori va mas’uliyatidan darak bermayaptimi?
Tabiiyki faoliyati tugatilgan bo‘lsa-da, o‘z nomidan g‘alla topshirgan “Amir hoji ota o‘g‘illari” fermer xo‘jaligi rahbari Kamoliddin Jumanov 2019-yil 3-avgust kuni Prezident portaliga murojaat qilib, davlatga topshirilgan don uchun pul to‘lanmayotganidan shikoyat qiladi. Don rahbariyati esa uning faoliyati tugatilib, “Dursun ilg‘ori” fermer xo‘jaligi tarkibiga qo‘shib yuborilganligini, lalmi yerdan topshirilgan 13,6 tonna g‘alla uchun hisob-kitob qilinajagini bildiradi.
“Don xalq rizqi” AJ yuristi Jasur Shopsanov yana bir gapida Chiroqchi tuman hokimligi “Amir hoji ota o‘g‘illari” fermer xo‘jaligining 50,3 gektar yerga egaligini tasdiqlovchi ijara shartnomasini bekor qilgani fermer xo‘jaligi tugatilishiga asos bo‘lolmasligini aytmoqda. Yurist nazdida shuning uchun ham “Don xalq rizqi” AJning bu boradagi xatti-harakati qonuniy.
“Don xalq rizqi” AJ yuristining qo‘shimcha qilishicha, “Amir hoji ota o‘g‘illari” fermer xo‘jaligiga tegishli yer tuman hokimligi tomonidan olib qo‘yilib, ijara shartnomasi bekor qilinsa-da, faoliyati paxtachilik va g‘allachilikka ixtisoslashgan fermer xo‘jaligi tugatilmagan hisoblanadi. Qiziq, unda yeri bo‘lmagan fermer xo‘jaligi qanday qilib don topshiradi? “Don xalq rizqi” AJ rahbariyati xayolidan shu fikr o‘tmadimi?
— Fermer xo‘jaligi rahbarining qo‘lida fuqarolik pasporti bor, fermer xo‘jaligi “pechati” bor, “shartnoma tuzaman” deb kelyapti, shunday bo‘lgach, biz shartnoma imzolab qo‘yaverdik-da, — deydi Jasur Shopsanov.
Ma’lum qilishlaricha, “Amir hoji ota o‘g‘illari” fermer xo‘jaligi lalmi yerdan davlatga 13,6 tonna g‘alla topshirgan bo‘lsa, “Dursun ilg‘ori” fermer xo‘jaligi 15 tonna g‘alla bergan. Fermerning aytishicha, rejada davlatga 13 tonna g‘alla topshirish mo‘ljallangan. Demakki, yangi tashkil etilgan fermer xo‘jaligi lalmi yer hisobidan g‘alla rejasini 200 foizga bajargan. Ammo 13,6 tonna g‘alla tugatilgan fermer xo‘jaligi nomidan topshirilgani bois, unga to‘lanadigan mablag‘ “Dursun ilg‘ori” fermer xo‘jaligiga to‘lab berilmayapti. Holbuki, g‘alla topshirgunga qadar barcha soliq to‘lovlari va davlatga to‘lanishi lozim bo‘lgan to‘lovlar “Dursun ilg‘ori” fermer xo‘jaligi hisobidan to‘lab kelingan.
“Dursun ilg‘ori” fermer xo‘jaligi rahbari Alisher Pardayevning aytishicha, ular ushbu muammo bilan tuman hokimi Rustam Jo‘raqobilov qabuliga bir necha marotaba borgan. Ammo hokim fermer xo‘jaligi vakillari sifatida borgan murojaatchilarni hatto eshitmagan ham. Qo‘pol gapirib, qaytarib yuborgan.
“Daryo” ushbu muammoni omma e’tiboriga havola qilish orqali “Don xalq rizqi” AJ va Chiroqchi tuman hokimligidan ushbu masalaga yechim topishda tashabbus ko‘rsatishni so‘rab qoladi. O‘ylaymizki, ushbu ishga mas’ul tashkilotlar fermerlarni qiynab kelayotgan muammoga yechim topadi.
Izoh (0)