“Qo‘riqlanayotgan obyektning xavfsiz faoliyatini ta’minlash” mavzusida batalyon taktik-maxsus o‘quv mashg‘ulotlari o‘tkazildi. Bu haqda Toifalangan obyektlarni qo‘riqlash qo‘shinlari matbuot xizmati “Daryo”ga xabar berdi.
Mudofaa vazirligi Toifalangan obyektlarni qo‘riqlash qo‘shinlari qo‘mondonligining Toshkent va Farg‘ona shaharlarida joylashgan harbiy qismlarida hamkorlikdagi vazirlik va idoralar bo‘linmalari ishtirokida “Qo‘riqlanayotgan obyektning xavfsiz faoliyatini ta’minlash” mavzusida batalyon taktik-maxsus o‘quv mashg‘ulotlari o‘tkazildi.
Mashg‘ulotlar davomida jalb etilgan batalyonlarni yuqori jangovar shaylik darajasiga keltirish, navbatchi kuchlar tomonidan shaxsiy tarkibni tezkorlik bilan xabardor qilish va yig‘ish, toifalangan obyektlar va harbiy qismlarning doimiy joylashuv joylari qo‘riqlovini kuchaytirish tadbirlari o‘z vaqtida, belgilangan tartibda amalga oshirildi.
Mazkur o‘quv mashqlarining amaliy qismida, qo‘riqlanayotgan obyektlar hududiga begona shaxslarning noqonuniy tarzda kirishiga yo‘l qo‘ymaslikka, obyektlar hududiga qo‘lbola portlovchi vositalarni olib kirilishining oldini olishga, qurollangan hujumni qaytarishga, toifalangan obyektlar hududiga kirib olgan tartibbuzarlarni izlash, qurshab olish va zararsizlantirish masalalariga asosiy e’tibor qaratildi.
Shuningdek, O‘zbekiston Respublikasi IIV, FVV va DXXning hamkorlikdagi bo‘linmalari bilan birgalikda, alohida belgilangan o‘quv joylarida yong‘in o‘choqlarini barataraf qilish, qo‘riqlanayotgan obyektlar atrofida tezkor-profilaktik va razvedka-qidiruv tadbirlarini o‘tkazish, blokpostlar ishini tashkil qilish, aniqlangan qo‘lbola portlovchi moslamalarni zararsizlantirish hamda tartibbuzarlarni qo‘lga olish tadbirlari ham amalga oshirildi.
Izoh (0)