Mo‘ynoqda “Stixiya” elektron musiqa festivali bo‘lib o‘tdi (foto)

23—24-avgust kunlari Qoraqalpog‘istonning Mo‘ynoq shahrida O‘zbekiston Respublikasi Turizmni rivojlantirish davlat qo‘mitasi qo‘llab-quvvatlashi ostida “Stixiya” elektron musiqiy festivali bo‘lib o‘tdi. Bu haqda tashkilotning matbuot xizmati xabar berdi.

“Stixiya” festivalida Angliya, Ispaniya, Germaniya, Daniya, Fransiya, Niderlandiya, Shvetsiya, Yangi Zelandiya, AQSh, Isroil, Janubiy Koreya, Gruziya, Rossiya, Qozog‘iston va Turkmaniston kabi mamlakatlardan kelgan sayyohlar, mahalliy aholi hamda O‘zbekistonning boshqa hududlaridan tashrif buyurgan mehmonlar ishtirok etdi. Ishtirokchilarning umumiy soni 5000 nafarni tashkil qilgan bo‘lsa, shundan 500 nafari xorijiy va mahalliy sayyohlardir.

Tadbirni o‘tkazishdan asosiy maqsad Mo‘ynoqqa xorijiy turistlar oqimini oshirish, O‘zbekistonda yoshlar turizmini rivojlantirish hamda jahon hamjamiyatini Orol bo‘yi ekologik muammosidan xabardor qilish.

Ikki kun davomida Alien Rain (Germaniya), Jamaica Suk (AQSh), Yan Cook (Ukraina), Acronym (Shvetsiya), Mama Snake (Daniya) va Dj Sodeyama (Yaponiya) kabi taniqli dijeylar yig‘ilganlarga ko‘tarinki kayfiyat bag‘ishladi.

Shuningdek, “Stixiya” festivalini yoritish uchun The Telegraph, Resident Advisor, NBC telekanali, Deutsche Welle, Guardian kabi mashhur xorijiy davlatlar ommaviy axborot vositalari vakillari hamda mustaqil blogerlar hamda Orol dengizi haqida kitob yozayotgan Jay Owens tashrif buyurdi.

Ta’kidlash lozim, NBC telekanali jurnalistlari “Stixiya” haqida film yaratmoqda va uni Nyu-Yorkdagi kinofestivalda namoyish qilmoqchi.

“O‘zbekistonda bunday darajadagi tadbir o‘tkazilishini kutmagandim, barchasi kutganimizdan-da a’lo! Men rassomman va shu sabab ushbu noyob hodisa menga yangi asar yaratish uchun ilhom bag‘ishladi. Ajoyib tabiat qo‘ynida bu kabi yoshlar tadbirlarining o‘tkazilishi, shubhasiz, yurtingizda turizmni yanada rivojlantirishga turtki beradi”, — dedi isroillik sayyohlardan biri.

Yaponiyalik Dj Sodeyama fursatdan foydalanib O‘zbekiston hukumatiga yaratilayotgan imkoniyatlar, tashkil etilayotgan bu kabi tadbirlar va taklif uchun samimiy minnatdorchiligini bildirdi.

Festival yakuniga ko‘ra, ko‘ngillilar tomonidan ishlangan SEA installyatsiyasi rasman yoqildi. Sayyohlar kelgusida ham O‘zbekistondagi bu kabi tadbirlarda qatnashish istagini bildirib qoldi. Tadbir “Fakultet” xususiy tashkiloti, O‘zbekiston Respublikasi Turizmni rivojlantirish davlat qo‘mitasi, Centil Law va Peoples Travel, “Gete” instituti va Indorama tomonidan tashkil etildi.