Obameyang Salohga, Emeri esa Kloppga qarshi. “Liverpul”—“Arsenal” to‘qnashuvi haqida

Xayol

Ichki chempionat degani shunday bo‘lsa-da. Birinchi turda “Neftchi” “Paxtakor” bilan, ikkinchisida “Bunyodkor” “Lokomotiv” bilan, keyingisida esa “Nasaf” “Paxtakor”. Mana buni haqiqiy millionlar o‘yini desa bo‘ladi. Angliyaliklarga esa qoyil qolmadik. Shu ham chempionatmi?! Yangi mavsumning ilk turida “Manchester Yunayted” o‘z uyida “Chelsi”ni po‘stagini qoqib qo‘ydi. Ikkinchi turda “Manchester Siti” va “Tottenhem” 2:2 hisobidagi qayoqdagi dramani muxlislarga taqdim etdi. Vey, uchinchi turga kelib “Liverpul”ni “Arsenal”ga ro‘baro qilib turibdi. Shu ham chempionatmi a, labbay? O‘rganmaysanmi bizniklardan? Chempionat boshlanishiga sanoqli kunlar qolganda jamoalar sonini osmondan tushgandek ko‘paytirib qo‘yishni qayoqdan ham bilardi, bu sodda inglizlar. Ha, mayli bir kun o‘rganib ketishar. Axir biz osmondagi yulduzlarni sanab yurgan paytimizda ular latta koptokni tepib yurishardi.

Voy, nimalar deb tashladik. O‘zimizga kelamiz va ichki xotirjamlikni ushlaymiz. Bir alahsirab oldik-da, aziz muxlis. “Neftchi”ning allaqachon Superligada emasligidan gap nima haqida ekanligini tushunganingizga ishonamiz. Kayfiyatni ko‘tarib olgan bo‘lsangiz, keling Angliya Premyer ligasi 3-turidan o‘rin olgan markaziy o‘yin: “Liverpul”—“Arsenal” to‘qnashuvi haqida suhbatlashamiz.

APLning ortda qolgan 2-turida 100 foizlik natija qayd etgan Mersisayd va London klubi bugun “Enfild” stadionida musobaqaning yakka hokimligi uchun maydonga tushadi. “Liverpul” dastlabki ikki turda mos ravishda “Norvich”ni 4:1, “Sauthempton”ni esa 2:1 hisobida taslim qildi. “To‘pchilar” esa avvaliga “Nyukasl”dan kichik 1:0 hisobida ustun kelgan bo‘lsa, o‘tgan turda Emeri shogirdlari “Byornli” ustidan 2:1 hisobidagi g‘alabani tantana qildi. Xo‘sh, bugun qaysi jamoa g‘alaba qozonadi?

O‘zi nima gap?

Ketma-ket ikki turda “Liverpul” o‘z darvozasidan gol olib chiqdi. O‘tgan yilgi metin himoyaning xizmatlari bitdimi dersiz? Yo‘q, hozircha aslo unday emas. Jamoaning asosiy posboni Alisson ilk turdayoq jarohat oldi. U maydonda bo‘lgan 39-daqiqa ichida “qizillar” gol o‘tkazmagan. Jamoaga endigina qo‘shilgan Adrian ikkinchi turga kelib, “Sauthempton” futbolchisi (vaqtida “Liverpul”da to‘p surgan) Denni Ingz oldida hayajonlanib qoldimi, xullas Minyole va Karius tushirgan qovunlardan birini o‘z hisobiga yozdirishga “muvaffaq bo‘ldi”. Endryu Robertson, Virjil van Deyk va Trent Aleksander-Arnold esa o‘zining ishonchli harakatlarini davom ettirmoqda. Ammo nima bo‘lganda ham “Arsenal”ning hujum triosi — Lyakazett—Obameyang—Pepega qarshi turish oson bo‘lmaydi. Alisson bo‘lganda esa “Liverpul”ning darvoza chizig‘i borasidagi xavotirlarimizni o‘rinsiz hisoblayversak bo‘lardi. Biroq bu safar unday emas. Kloppning hujum chizig‘idan ko‘ngli to‘q. Mane—Saloh—Firmino triosi har qanday himoyani, ayniqsa, “Arsenal”nikini parchalab tashlashga qodir. Nega unday deysizmi? O‘tgan mavsum “Liverpul” “Enfild”da Bernd Leno darvozasiga naq 5 ta gol urgandi. Bu safar “kanonirlar” Loran Kosyelni, Ektor Belyerin kabi futbolchilar xizmatidan foydalana olmaydi. Kosyelni Fransiyaga ko‘ch-ko‘ronini yig‘ishtirib ketgan bo‘lsa, Belyerin hamon jarohatini tiklash bilan ovora. “Chelsi”dan kelgan David Luiz esa hali klubga moslashib ulgurmaganini hisobga olish lozim. Bundan tashqari “Seltik”dan xarid qilingan Kiran Tirni hali jarohatdan qutulmagan. Ko‘rib turganingizdek muammolar yetarlicha. Umuman olganda esa “Arsenal”ning himoyasiga nisbatadan “Liverpul”niki kabi “ishonchli” ta’rifini berib bo‘lmaydi. Biroq yuqorida ta’kidlaganimizdek, “Arsenal”ning hujum triosi ham chakki emas. Kamiga o‘tgan o‘yinda qahramonlik ko‘rsatgan Dani Sebalyos ham bor. Xullas, aziz muxlis, bugun siz-u bizni haqiqiy futbol spektakli kutmoqda!

Qiziqarli faktlar

• “Liverpul” APL doirasidagi o‘z maydonidagi so‘nggi 39 ta o‘yinda yutqazmadi
• “Liverpul” APLning so‘nggi 11 ta o‘yinida kamida 2 tadan gol urmoqda
• “Liverpul” so‘nggi  11 ta o‘yindan 8 tasida raqiblar darvozasiga kamida 2 ta gol urgan
• “Liverpul” “Arsenal”ga qarshi so‘nggi 4 ta uy uchrashuvida kamida 3 tadan gol urdi
• Roberto Firmino hisobida hozirda APLda urilgan 49 ta gol bor. Agar u bugun gol ursa, musobaqa tarixida 50 ta gol urgan ilk braziliyalik futbolchi bo‘ladi
• “Liverpul” “Arsenal”ga qarshi so‘nggi 3 ta uy uchrashuvida g‘alabani o‘ziniki qilgan
• “Arsenal” so‘nggi 8 ta o‘yinda “Liverpul”ni mag‘lub eta olmagan: 4 ta durang, 4 ta mag‘lubiyat
• “Arsenal” 2004/05-yilgi mavsumdan beri ilk bor mavsumni ketma-ket uchta g‘alaba bilan boshlashi mumkin
• Yurgen Klopp “Arsenal”ga qarshi APLda 7 marta to‘qnash kelgan va biror marta yutqazmagan: 4 ta g‘alaba, 3 ta durang.