FIFA kunlarida yuzaga keladigan tanaffusdan avval ko‘plab chempionatlarda navbatdagi tur uchrashuvlari o‘tkaziladi. “Daryo” mazkur dam olish kunlarida bo‘lib o‘tadigan eng muhim o‘yinlarga qisqacha to‘xtalib o‘tadi.
“Manchester Yunayted” — “Kristal Pelas”
APL, 3-tur24-avgust, 19:00
Angliya chempionatini “Chelsi”ga qarshi o‘yindagi ajoyib g‘alaba bilan boshlagan “Manchester Yunayted” bugun o‘z maydonida “Kristal Pelas”ni qabul qiladi. O‘tgan turda “Manchester Yunayted” o‘zi uchun noqulay raqib hisoblangan “Vulverhempton” bilan durang o‘ynadi. “Kristal Pelas” dastlabki turda “Everton” bilan durang o‘ynab, o‘zi uchun qoniqarli natija qayd etgan bo‘lsa, ikkinchi turda liga debyutanti “Sheffild Yunayted”ga imkoniyatni boy berdi.
“Burgutlar” mankunianlar uchun qulay raqiblardan biri hisoblanadi. Ushbu jamoalar APL tashkil qilingandan shu kunga qadar 20 marta o‘zaro to‘qnash kelgan bo‘lsa, ularning 16 tasida “qizil iblislar”ning qo‘li baland kelgan va to‘rtta o‘yinda durang qayd etilgan. So‘nggi bor “Pelas” “Yunayted”ni 1989-yilda mag‘lubiyatga uchratgan, shundan keyin birorta ham bahsda londonliklar muvaffaqiyat qozona olmagan.
Buning ustiga “Old Trafford” poytaxt jamoalari uchun o‘ta omadsiz stadion hisoblanadi. APL tarixidagi 152 ta o‘yinda London klublari bor-yo‘g‘i 16-marta uyga uch ochko bilan qaytgan.
“Liverpul” — “Arsenal”
APL, 3-tur24-avgust, 21:30
Angliya chempionati yetakchilari ishtirokidagi bu o‘yin butun dunyo nigohida turibdi desak adashmagan bo‘lamiz. Eng kuchli hujum chizig‘iga ega bo‘lgan jamoalar ishtirokidagi o‘yin haqida avvalroq batafsil to‘xtalib o‘tgandik.
“Shalke-04” — “Bavariya”Bundesliga, 2-tur
24-avgust, 21:30
Germaniya chempionatining ikkinchi turida “Bavariya” klubi Gelzenkirxenga safar qiladi. U yerda Niko Kovach shogirdlarini “Shalke-04”ga qarshi bahs kutib turibdi. Ikkala jamoa ham musobaqani durang natija bilan boshladi. Unda qo‘lga kiritilgan 1 ochko mezbonlar uchun qoniqarli natija hisoblanishi mumkin, biroq myunxenliklar uchun kutilmagan hol bo‘ldi.
Mazkur o‘yinda “Bavariya” yangi “qurollari”ni ishga solishi mumkin. Yaqinda jamoaga qo‘shilgan Ivan Perishich va Fileppe Koutinyolar ushbu qarama-qarshilikda debyutlarini nishonlashi mumkin.
Bu uchrashuv myunxenliklar darvozaboni Manuel Noyer uchun ham prinsipial ahamiyatga ega. “Shalke-04” tarkibidagi posbon Aleksandr Nyubel o‘tgan mavsumning ikkinchi yarmidan buyon ajoyib o‘yin ko‘rsatib kelmoqda. “Bavariya” unga Noyerning o‘rinbosari sifatida qaramoqda va keyingi yili Nyubelni tekinga qo‘lga kiritmoqchi. “Shalke-04” esa yosh iqtidor egasini tarkibda saqlab qolish uchun unga sardorlik bog‘ichini taqdim etdi.
“Real” — “Valyadolid”
La Liga, 2-tur24-avgust, 22:00
“Real” yangi mavsumdagi ilk uy o‘yinini “Valyadolid”ga qarshi o‘tkazadi. “Blankos” tarkibdagi jiddiy yo‘qotishlarga qaramay mavsumni ajoyib tarzda boshladi. Zinedin Zidan shogirdlari La Liganing ilk turida Vigoda “Selta”ga imkon qoldirmadi. Ta’kidlash joiz, Luka Modrichning chetlatilishidan keyin jamoa yana ikkita gol urishga muvaffaq bo‘ldi. Buning ustiga yozda ko‘plab muhokamalarga sabab bo‘lgan Garet Beyl uchrashuvning eng yaxshi o‘yinchilaridan biri bo‘ldi.
“Real” sobiq hujumchisi Ronaldoga tegishli bo‘lgan “Valyadolid” klubi 1-turda kutilmagan natijalardan birini qayd etdi. Jamoa Sevilyaga safar qilib “Betis”ni mag‘lubiyatga uchratishga erishdi.
Mazkur o‘yin oldidan madridliklarda kadrlar muammosi yetarli darajada, Luka Modrich diskvalikatsiya tufayli o‘yinni o‘tkazib yuboradi. Shuningdek, Eden Azar, Braim Dias, Ferlan Mendi, Rodrigo Goes va Marko Asensio jarohat sabab “Real”ga yordam bera olmaydi.
“Real”dan “Valyadolid”ga ijara asosida yo‘l olgan Andrey Lunin Madriddagi o‘yinda o‘z jamoasiga qarshi maydonga tushishi mumkin. Tibo Kurtua va Keylor Navasga raqobat qila olmasligi deyarli aniq bo‘lgan ukrainalik darvozabon yetarli o‘yin amaliyotiga ega bo‘lish uchun boshqa jamoa safiga yo‘l olgandi.
“Fiorentina” — “Napoli”
A Seriya, 1-tur24-avgust, 23:45
Mazkur hafta Italiya chempionatiga start beriladi. Ilk turning markaziy o‘yini muhtasham Florensiyada bo‘lib o‘tadi. Mezbon “Fiorentina” klubi “Napoli”ni qabul qiladi.
“Fiorentina” har doim yetakchilarga munosib qarshilik ko‘rsatib, yuqori o‘rinlar uchun kurashadigan jamoa bo‘lgan. Biroq o‘tgan mavsum jamoada pasayish yuzaga keldi va “binafsharanglilar” turnir jadvalini 16-o‘rinda yakunladi. Klub mazkur transfer oynasida tajribali yarim himoyachi Frank Riberi o‘z safiga qo‘shib oldi. Garchi bu o‘yinda “Fiorentina” favorit hisoblanmasada fantastik muxlislarning qo‘llab-quvvatlashi jamoaga qo‘shimcha motivatsiya berishi mumkin.
“Napoli” esa nafaqat ushbu bahsning, balki, musobaqaning favoriti hisoblanadi. Bu yil ham Karlo Anchelotti shogirdlari “Yuventus”ning gegemoniyasiga chek qo‘yishga urinib ko‘radi. Neapolliklar shu haftada Irving Losano transferini e’lon qildi va jamoaning hujum chizig‘i yana bir tezkor futbolchi bilan boyitildi.
“Barselona” — “Betis”
La Liga, 2-tur25-avgust, 23:59
Mavsumni sensatsion natija bilan boshlagan “Barselona” bu turda “Kamp Nou”da “Betis”ni mehmon qiladi. Lionel Messisiz Bilbaoga yo‘l olgan jamoa 1-tur bahsida “Atletik”dan alamli mag‘lubiyatni qabul qilib olgandi. Qizig‘i, “Betis” ham “Valyadolid”dan xuddi shunday “zarba”ni qabul qilib oldi. O‘tgan uchrashuvdagi natijadan jazavada turgan bu jamoalar o‘rtasidagi bahs shubhasiz turning eng muhim o‘yiniga aylanadi.
“Barselona” tarkibiga Messi qaytdi, biroq uning to‘liq harakat qila olish imkoniyati juda kam. Buning ustiga Usmon Dembele va Luis Suares ham safdan chiqqan. Birinchi turdagi natijadan keyin tanqidlar ostida qolgan Ernesto Valverde hozirda kuchli bosim ostida turibdi. “Betis”ning o‘tgan mavsum “Kamp Nou”dagi (4:3 hisobida) g‘alabasi ko‘pchilik futbol muxlislarining yodidan chiqmagani aniq. Xullas, mazkur o‘yin yakshanba oqshomining haqiqiy bezagiga aylanishi tabiiy.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)