Qozog‘iston O‘zbekistonga yirik shoxli chorva sotishni taqiqlash rejasidan qisman voz kechdi

Qozog‘iston qishloq xo‘jaligi vazirligi yirik shoxli chorvani O‘zbekistonga olib kirilishiga to‘liq taqiq kiritilishi haqidagi rejadan qisman voz kechdi.

Bu katta talab mavjudligi bilan bog‘liq. Cheklovlar esa faqat urg‘ochi mollarga taalluqli.

Bundan oldin qozog‘istonlik fermerlar O‘zbekistonga juda katta miqdorda chorva olib kirayotgani, bu yerda mol go‘shtini sotish foydaliroq ekani haqida xabarlar tarqalgandi. Bu esa Qozog‘istonning o‘zida go‘sht taqchilligini yuzaga keltirib, narxlarni ko‘tarib yubordi.

“Avvaliga hamma turdagi chorvani chegaradan tashqariga olib chiqilishini taqiqlash masalasi ko‘rib chiqilgan edi, ammo keyin biz Go‘sht ittifoqi bilan hamkorlikda xorijga 30 foizli ustama bilan chiqarish biznes uchun foydali degan qarorga keldik, — dedi vazir o‘rinbosari Gulmira Isayeva. — Nega bunday qilmasligimiz kerak? Shuning uchun faqat urg‘ochi mollar olib chiqilishiga taqiq qo‘yish bo‘yicha qaror qabul qildik”.