23-avgustning e’tiborga molik yangiliklari — “Daryo” dayjestida.
O‘zbekiston Respublikasi Prezidenti Shavkat Mirziyoyev raisligida 23-avgust kuni xalq ta’limi tizimini rivojlantirish, pedagoglarning malakasi va jamiyatdagi nufuzini oshirish, yosh avlod ma’naviyatini yuksaltirish masalalariga bag‘ishlangan videoselektor yig‘ilishi bo‘lib o‘tdi.
“O‘zbekiston sharoitida jamiyatdagi eng hurmatli inson — muallim. Vazirlar, prokurorlar ham endi maktablarda o‘z sohasi bo‘yicha dars beradi”, — dedi Shavkat Mirziyoyev.
“Maktab o‘qituvchisini moddiy rag‘batlantirmasak, uning hayot sifati darajasini oshirmasak, islohot, natija haqida gapira olmaymiz”, dedi Prezident.
Shu munosabat bilan Vazirlar Mahkamasi, Moliya va Xalq ta’limi vazirliklariga 2020-yilda xalq ta’limi xodimlari oylik ish haqini oshirish yuzasidan ko‘rsatmalar berildi. Uzoq qishloqlardagi maktablarga o‘qituvchilarni jalb etishni yanada rag‘batlantirish uchun ularga uy-joylar, avtotransport uchun kreditlar berish ham ko‘zda tutilgan.
***
O‘zbekistonda dollar kursi qatorasiga uchinchi kun pasaymoqda.
23-avgust kuni 1 dollar 9366 so‘m bo‘lgani qayd etildi va kurs bir kun avvalgiga nisbatan 5 so‘mga pasaydi.
***
Rossiyaga 13 yil avval ketgancha uyiga qaytib kelmagan samarqandlik Shohista Soliyeva qidirilmoqda.
U haqida biror-bir ma’lumotga ega bo‘lgan shaxslardan 94-608-05-74, 94 180-57-35, 93 669-23-64 raqamlariga qo‘ng‘iroq qilish so‘ralgan.
***
Fransiyada 66 yoshli jarroh 250 nafar bolaga nisbatan jinsiy zo‘ravonlikda gumon qilinmoqda. “Vesti.ru”ning xabar berishicha, erkak butun Fransiya davlati tarixida eng yomon pedofil, deb aytilmoqda.
Qayd etilishicha, shifokor 2017-yilda pedofillikda ayblanib, hibsga olingan. Hozirda erkakning jinoiy xatti-harakatlariga oid yangi dalillar paydo bo‘lmoqda. Gumonlanuvchining o‘zi unga qo‘yilgan ayblovlarni rad etmoqda, lekin kichik yoshdagi qizlarga nisbatan deviant xulq-atvorini tan olgan.
Tergov harakatlari davomida pedofil-shifokorning kundaligi topilgan bo‘lib, unda 250 nafar bolaga nisbatan jinsiy xarakterdagi harakatlari batafsil bayon etilgan
***
Qirg‘iziston Jo‘qorg‘i Kengesi deputati Irina Karamushkina mamlakat sobiq prezidenti Almazbek Atambayevning qarorgohida asirlarni qo‘lga olishga aloqadorlikda gumon qilinmoqda.
Irina Karamushkina Qirg‘iziston Jinoyat kodeksining 244-moddasi (“Ommaviy tartibsizliklar tashkilotchisi”) bilan gumonlanayotgani haqida rasmiy ogohlantirish xatini olgan.
***
Maykl Jeksonning sobiq agenti Reymon Beyn qo‘shiqchining o‘limidan bir necha yil oldin maxfiy vasiyat yozganini ma’lum qildi.
Beynning so‘zlariga ko‘ra, hujjat 2006-yilda tuzilgan va u bundan 4 yil avval yozilgan vasiyatnomaning o‘rnini bosishi lozim bo‘lgan.
Uning ta’kidlashicha, Jekson uning merosini qanday saqlab qolish kerakligi haqida hujjatda batafsil bayon qilgan. Beyn, shuningdek, hujjatning notarial tasdiqlanishida ishtirok etganini va uning mazmunini eshitganini ham aytgan.
Izoh (0)