Toshkentdagi xonadonlardan birida GSM-shlyuz noqonuniy o‘rnatilganligi aniqlandi

Toshkentdagi xonadonlardan birida noqonuniy GSM-shlyuz o‘rnatilganligi aniqlandi, deb xabar beradi IIBB matbuot xizmati.

Aniqlanishicha, Yunusobod tumanida 30 yoshli fuqaro uyiga GSM-shlyuz o‘rnatib, yashirin xalqaro so‘zlashuv shoxobchasini ochgan.

Ushbu fakt bo‘yicha Jinoyat kodeksining 278- moddasi (“Telekommunikatsiya tarmog‘idan qonunga xilof ravishda (ruxsatsiz) foydalanish”) bilan jinoiy ish qo‘zg‘atildi.

Unga ko‘ra, telekommunikatsiya tarmog‘idan qonunga xilof ravishda foydalanish, shuningdek, maxsus dasturiy yoki apparat vositalarini saqlash va ularning faoliyat ko‘rsatishi uchun sharoitlar yaratish eng kam oylik ish haqining 100 baravaridan 300 baravarigacha miqdorda jarima yoki bir yildan uch yilgacha ozodlikdan cheklash yoxud uch yilgacha ozodlikdan mahrum qilish bilan jazolanadi.