Atambayevning qishloqdoshlari Sooranbay Jeenbekovga murojaat bilan chiqdi
Qirg‘iziston sobiq prezidenti Almazbek Atambayev istiqomat qilgan Qo‘y-Tosh qishlog‘i aholisi mamlakat prezidentiga murojaat bilan chiqdi, deb xabar beradi “24.kg”.
Ularning ta’kidlashicha, Milliy xavfsizlik davlat qo‘mitasiga qarashli “Alfa” maxsus bo‘linmasi boshlig‘i o‘rinbosari Usenbek Niyazbekovning o‘limida Atambayevni qo‘lga olish operatsiyasini uyushtirganlar aybdor va kuch tuzilmalarining rahbarlari javobgarlikka tortilishi kerak.
“Hozirda bizning farzandlarimizni ta’qib qilishmoqda, ularga nisbatan jinoiy ish qo‘zg‘atishyapti. Biroq asosiy masala bu emas, nima uchun maxsus operatsiya o‘tkazildi. Biz hukumatga murojaat qilamiz: davlatni bo‘lishni va qonunni buzishni to‘xtating. Maxsus operatsiyani o‘tkazganlarni ishdan bo‘shating. Agarda shunday qilmasangiz, jamiyatimiz bo‘linib ketadi”, — deydi Qo‘y-Tosh aholisi.
7—8-avgust kunlari Qo‘y-Tosh qishlog‘ida Qirg‘izistonning sobiq prezidenti Almazbek Atambayevni qo‘lga olish bo‘yicha operatsiya qattiq qarshilikka uchragan edi. Almazbek Atambayev 8-avgust kuni o‘zining Qo‘y-Toshdagi qishlog‘ida joylashgan uyida qo‘lga olingan.
