O‘zbekiston Respublikasi Energetika vazirligi quyi tashkilotlarida huquqbuzarliklarning oldini olish va ularga qarshi kurashish borasida tegishli ishlarni amalga oshirmoqda, deb xabar beradi vazirlik matbuot xizmati.
Elektr va gaz ta’minoti korxonalari xodimlari tomonidan yo‘l qo‘yilgan qonunbuzarliklarni tahlil qilish orqali, O‘zbekiston Respublikasi Davlat budjetiga qo‘shimcha mablag‘lar tushirildi. Shuning bilan birga, Energetika vazirligi huzuridagi Elektr energetikada nazorat inspeksiyasi (O‘zenergoinspeksiya) va Neft mahsulotlari va gazdan foydalanishni nazorat qilish inspeksiyasi (O‘zneftgazinspeksiya) tomonidan qonunbuzilishlarni aniqlash yuzasidan tegishli ishlar olib borilyapti.
Jumladan, 2019-yil 1avgust holatiga ko‘ra, dastlabki hisob-kitoblar bo‘yicha 1,9 milliard zarar yetkazilganlik holati bo‘yicha energetika tizimidagi korxonalar ishchilariga nisbatan prokuratura tomonidan 25 ta jinoyat ishi qo‘zg‘atildi.
Jinoyat ishlari O‘zbekiston Respublikasi Jinoyat kodeksining “talon-taroj qilish”, “firibgarlik”, “elektr, issiqlik energiyasi, gaz va suv tarmoqlaridan foydalanish qoidalarini buzish”,“mansab vakolatini suiiste’mol qilish”, “soxtalashtirish” va boshqa moddalari bo‘yicha qo‘zg‘atilgan.
Energetika tizimidagi korxonalarining aybdor shaxslariga nisbatan ozodlikdan mahrum etish (3 kishi), axloq tuzatish ishlari (2 kishi), jarima (1 kishi) va boshqa jazo choralari tayinlandi.
Hozirgi vaqtda yetkazilgan zarardan 116,3 mln so‘mi energetika tizimidagi quyi tashkilotlarning hisob-raqamlariga qaytarilgan.
Shuningdek, dastlabki hisob-kitoblarga ko‘ra, 21,1 million so‘m miqdorida zarar yetkazganlik holati bo‘yicha Zirabuloq magistral gaz tarmog‘i boshqarmasining 2 nafar xodimiga nisbatan qo‘zg‘atilgan jinoyat ishi bo‘yicha tergov harakatlari olib borilmoqda.
Izoh (0)