Forish tog‘ poligonida O‘zbekiston va Hindiston harbiy xizmatchilari o‘rtasida muhandislik tayyorgarligi bo‘yicha o‘quv-amaliy mashg‘ulotlari o‘tkazilmoqda.
Mudofaa vazirligi Axborot va ommaviy kommunikatsiyalar departamenti xabariga ko‘ra, unda ikki mamlakatning malakali mutaxassislari o‘zaro tajriba almashib, turli trening va mashg‘ulotlarni bajarmoqda.
Ularning birida Hindiston Qurolli Kuchlari muhandislari guruhi vakillari podpolkovnik Prasant Bist, katta serjant Anil Kumar, serjant Bijay Kumar Ray shartli yo‘llarga bomba va minalarni o‘rnatgan. Tajribali muhandis-sapyorlardan iborat harbiy xizmatchilarimiz maxsus o‘rgatilgan xizmat iti, mina qidiruvchi uskunalar va xavfsizlikni ta’minlovchi zamonaviy himoya kiyimlarida mashqlarni bajargan.
Ta’kidlanishicha, har ikki tomon o‘quv mashg‘ulotning samarali va yuqori darajadagi talablarga javob bera olishini ta’minlash maqsadida mashqlarni real vaziyatlarga yaqinlashtirgan holda olib borilmoqda.
O‘zbek harbiy muhandislari o‘rnatilgan mina va bombalarni qidirib topish hamda ularni zararsizlantirish borasidagi tajribalarini namoyish etgan. O‘z navbatida hindistonlik yo‘riqchilar o‘zbekistonlik harbiylar topshiriqni bajarayotgan paytda shartli ravishda minalardan birini portlatgan. Bu jarayonlar dasturga muvofiq amalga oshirilib, mashg‘ulotning real vaziyatga yaqinlashtirilgan holda o‘tishini ta’minlagan. O‘rnatilgan qolgan bombalar ham qidirib topish jarayonidan so‘ng, qoidaga binoan tajribali sapyorlar tomonidan zarasizlantirilgan.
Shuningdek, har ikki davlat harbiy muhandislari terrorchilar tomonidan mina va bomba tayyorlashda ishlatadigan portlovchi moddalardan foydalangan holda o‘zaro tajriba almashgan.
Izoh (0)