Daniya qirollik oilasi a’zolari AQSh prezidenti Donald Trampning Grenlandiyani sotib olish taklifiga ijobiy qaradi, deb xabar bermoqda “TASS”.
Malika Antoniya Shaumburg-Lippe bu taklifni “sehrli Grenlandiya uchun maqtov” deb qabul qilgan. Uning so‘zlariga ko‘ra, faqat orzu qilingan hududlargina bunday taklif oladi. U, shuningdek, bu orol taqdirini unda yashaydigan aholi hal qilishi lozimligini qo‘shimcha qilgan.
Uning o‘g‘li shahzoda Mario Maks Shaumburg-Lippe onasining fikriga qo‘shilib, grenlandiyaliklar tomonidan ijobiy deb qabul qilingan har qanday qaror qo‘llab-quvvatlanishi kerakligini ta’kidlagan.
Eslatib o‘tamiz, 16-avgust kuni The Wall Street Journal Tramp AQShning Arktikadagi o‘rnini kuchaytirish maqsadida Grenlandiya orolini sotib olmoqchiligini ma’lum qilgandi. Ammo Daniya bosh vaziri Mette Frederiksen qirollik tarkibiga kiruvchi Grenlandiyaning sotilishi imkoniyatini qat’iy rad etgan.
Izoh (0)