18-avgust kuni Qarshi shahrida viloyat IIB Yo‘l harakati xavfsizligi boshqarmasi inspektorlari tomonidan o‘tkazilgan tadbirda 15 ta avtomobil noqonuniy tonirovka o‘rnatgani aniqlandi va jarima maydoniga joylashtirildi. Bu haqda “Daryo”ga viloyat Yo‘l harakati xavfsizligi boshqarmasi matbuot xizmati rahbari Javlon Baxtiyev xabar bermoqda.
Mazkur tadbir Vazirlar Mahkamasi tomonidan tonirovkaga rasman ruxsat berilgandan so‘ng amalga oshirilayotgan dastlabki nazorat tadbiri hisoblanadi.
— Tonirovka uchun ruxsat olgan avtomobillarning 313 tasi orqa yon oynalar tusini o‘zgartirish uchun 2 million 230 ming so‘m davlat boji to‘lagan bo‘lsa, 41 nafar yurtdoshimiz barcha yon oynalar tusini o‘zgartirish uchun talab qilinadigan 11 million 150 ming so‘m pul to‘lab, 2-toifani ma’qul ko‘rgan, — deydi Javlon Baxtiyev. — Ming taassufki, hech qanday davlat boji to‘lovini amalga oshirmasdan o‘zboshimchalik bilan tonirovka o‘rnatayotgan haydovchilarimiz ham ko‘pchilikni tashkil etmoqda. Qarshi shahrida bo‘lib o‘tgan bir kunlik tadbirda 15 nafar noqonuniy tonirovka o‘rnatgan haydovchi aniqlangani ham buni isbotlab turibdi.
Yo‘l harakati xavfsizligi boshqarmasi matbuot xizmatining ma’lumot berishicha, ayni kunga qadar viloyatda 354 ta avtomobilga tonirovka uchun ruxsat berilgan. Tonirovka uchun rasman ruxsat berilgan avtomobillarning 298 tasi jismoniy shaxslarga tegishli bo‘lsa, 56 ta avtomobil yuridik shaxslar avtomobili hisoblanadi.
Eslatib o‘tamiz, maxsus ruxsatnomasiz mashina oynalarini tonirovka qilgan hamda haydovchining o‘rnidan tevarak-atrofni ko‘rishni cheklaydigan qo‘shimcha narsalar o‘rnatilgan (masalan, orqa yon oynalarga pardalar) bo‘lsa, jarima jazosi EKIHning 25 barobari (5 million 575 ming so‘m) etib belgilangan.
Izoh (0)