O‘zbekistonda bugungi kunda 1 383 investor tomonidan davlat aktivlariga 2,8 trillion so‘m va 669,5 million AQSh dollari miqdorida sarmoya kiritilishi va natijada hududlarda 42 mingga yaqin yangi ish o‘rni yaratilishi ko‘zda tutilgan. Bu haqda “Daryo”ga Davlat aktivlarini boshqarish agentligi matbuot xizmati ma’lum qildi.
Agentlik tomonidan ushbu investitsiya majburiyatlari bajarilishining doimiy monitoringi yo‘lga qo‘yilgan bo‘lib, tadbirkorlarni qiynayotgan, o‘ylantirayotgan masalalar, yuzaga kelayotgan muammolar tizimli ravishda o‘rganilmoqda va ularni hal etish choralari ko‘rilyapti.
Jumladan, hududiy boshqarmalar tomonidan davlat aktivlarini investitsiya kiritish sharti bilan sotib olgan 1322 investorning holati o‘rganildi. Natijalarga ko‘ra, ularning 63 tasida o‘z yechimini kutayotgan masalalar borligi aniqlangan.
Jumladan, Toshkent viloyatidagi 211 nafar tadbirkorning 18, Andijon viloyatidagi 180 investorning 5, Qashqadaryo viloyatidagi 99 ta tadbirkorlik subyektining 8 tasida muammosi bor. Ularning aksariyati shartnoma ishtirokchisi bo‘lgan davlat organi va mahalliy hokimliklar vakillariga ta’lluqli.
Aniqlangan muammolardan 53 tasi agentlik xodimlarining tezkor say’-harakatlari bilan hal etilgan va qolgan 10 tasini yechish bo‘yicha tegishli choralar ko‘rilmoqda.
Izoh (0)