Mirishkor tuman hokimligi 41 nafar ijtimoiy himoyaga muhtoj fuqaroga nogironlik aravachasi topshirdi
Mirishkor tuman hokimligi tashabbusi bilan 12-avgust kuni tumandagi 69 nafar ijtimoiy himoyaga muhtoj fuqaroga nogironlik aravachasi, qo‘ltiqtayoq, eshitish moslamasi, ko‘zoynak va protez topshirildi. Bu haqda “Daryo”ga tuman hokimligi matbuot xizmati xabar bermoqda.
Tuman hokimligi matbuot xizmatining ma’lum qilishicha, tumanda ayni kunda ijtimoiy himoyaga muhtoj fuqarolar ro‘yxatida turgan nogironligi bor 69 nafar fuqaroga mahalliy budjet mablag‘lari va homiylik yordami bilan 41 ta nogironlik aravachasi, 10 ta qo‘ltiqtayoq, 12 ta eshitish moslamasi, 4 ta ko‘zoynak va 2 ta protez topshirilgan. 72 nafar kam ta’minlangan oilalarga esa oziq-ovqat mahsulotlari berilgan.
“5 yildan beri yurolmayman, — deydi Guliston qishlog‘ida yashovchi 89 yoshli Ibrohim bobo Mahmanazarov. — Tuman hokimiga murojaat qilgandim, baraka topishsin nogironlik aravachasi berishdi. Endi ko‘cha-ko‘yga chiqib, qo‘shnilar bilan suhbatlashaman. Bundan judayam xursandman”.
Tuman tibbiyot birlashmasi bosh shifokori G‘anisher Umrzoqovning aytishicha, tumanda viloyat sog‘liqni saqlash boshqarmasi qoshida tashkil etilgan ijtimoiy yordam agentligi vakillari mavjud bo‘lib, ular Ibrohim bobo Mahmanazarov kabi ijtimoiy yordamga muhtoj oilalarga yordam berib keladi.
“Viloyat sog‘liqni saqlash boshqarmasi qoshida tashkil etilgan ijtimoiy yordam agentligining tumanimizdagi vakillari hududdagi ijtimoiy ko‘makka muhtoj fuqarolarga yordam berishni maqsad qilgan, — deydi agentlikning tumandagi vakili Olim Yomg‘irov. — Dilnoza Islomova ushbu agentlikning tumandagi ‘Inobat’, ‘Navbahor’, ‘Guliston’ va ‘Yangi Jeynov’ qishloqlariga biriktirilgan vakili bo‘lib, ijtimoiy yordamga muhtoj oilalarga ko‘maklashib keladi”.
Tuman hokimligi matbuot xizmatining qo‘shimcha qilishicha, ushbu xayrli ishlarni amalga oshirish uchun jami 67 million so‘m mablag‘ sarflangan. Shundan 34 million so‘mi tuman budjetidan qoplangan bo‘lsa, 10 million so‘m Xotin-qizlar qo‘mitasi va 23 million so‘m homiylar yordami evaziga qoplangan.
Aytishlaricha, ayni kunda tumandagi barcha nogironligi bor shaxslarning ehtiyoji qoplangan.
